ആരാധകരെ ആവേശം കൊള്ളിച്ചു ജോഷിയോടൊപ്പം വീണ്ടും സുരേഷ് ഗോപി; പാപ്പൻ മോഷൻ പോസ്റ്റർ കാണാം..!

മലയാളത്തിന്റെ ആക്ഷൻ സൂപ്പർ സ്റ്റാർ സുരേഷ് ഗോപിക്ക് കിടിലൻ കഥാപാത്രങ്ങൾ തന്റെ ചിത്രങ്ങളിലൂടെ സമ്മാനിച്ചിട്ടുള്ള സംവിധായകൻ ആണ് മലയാളത്തിന്റെ മാസ്റ്റർ ഡയറക്ടർ ആയ ജോഷി. ഒരിടവേളക്ക് ശേഷം ജോഷിയും സുരേഷ് ഗോപിയും ഒന്നിക്കുന്ന ചിത്രമാണ് പാപ്പൻ. ഇപ്പോൾ ചിത്രീകരണം നടന്നു കൊണ്ടിരിക്കുന്ന ഈ ചിത്രത്തെ കുറിച്ച് വലിയ പ്രതീക്ഷകളാണ് സുരേഷ് ഗോപി ആരാധകർക്കും സിനിമാ പ്രേമികൾക്കും ഉള്ളത്. ഒരിക്കൽ കൂടി സുരേഷ് ഗോപി- ജോഷി ടീമിൽ നിന്ന് ഒരു തീപ്പൊരി ചിത്രം ലഭിക്കുമെന്നാണ് ഏവരും പ്രതീക്ഷിക്കുന്നത്. ഒരു മാസ്സ് ത്രില്ലിംഗ് ചിത്രമായിരിക്കും പാപ്പൻ എന്നുള്ള സൂചനയാണ് ഇന്ന് റിലീസ് ചെയ്ത ഇതിന്റെ കിടിലൻ മോഷൻ പോസ്റ്ററും നമ്മുക്ക് തരുന്നത്. യുവ താരം ദുൽഖർ സൽമാൻ ആണ് ഈ മോഷൻ പോസ്റ്റർ റിലീസ് ചെയ്തിരിക്കുന്നത്. ഗംഭീര പ്രേക്ഷക പ്രതികരണമാണ് ഈ മോഷൻ പോസ്റ്ററിന് ലഭിക്കുന്നത് എന്നതും സന്തോഷം നൽകുന്ന കാര്യമാണ്.

ഡേവിഡ് കാച്ചപ്പിള്ളിയും ശരീഫ് മുഹമ്മദും ചേർന്ന് ഡേവിഡ് കാച്ചപ്പിള്ളി പ്രൊഡക്ഷൻസ്, ക്യൂബ്സ് ഇന്റർനാഷണൽ ഗ്രൂപ്പ് എന്നീ ബാനറുകളിൽ നിർമ്മിക്കുന്ന ഈ ത്രില്ലർ ചിത്രം രചിച്ചിരിക്കുന്നത് ആർ ജെ ഷാൻ ആണ്. അജയ് ഡേവിഡ് കാച്ചപ്പിള്ളി ക്യാമറ ചലിപ്പിക്കുന്ന ഈ ചിത്രം എഡിറ്റ് ചെയ്യുന്നത് ശ്യാം ശശിധരനും ഇതിനു സംഗീതമൊരുക്കുന്നത് ജേക്സ് ബിജോയിയും ആണ്. സുരേഷ് ഗോപിക്ക് ഒപ്പം സണ്ണി വെയ്ൻ, നൈല ഉഷ, നീത പിള്ളൈ, ഗോകുൽ സുരേഷ് ഗോപി, ആശ ശരത്, കനിഹ, മാളവിക മേനോൻ, വിജയ രാഘവൻ, ടിനി ടോം, ഷമ്മി തിലകൻ, ശ്രീജിത്ത് രവി, മാല പാർവതി, സാധിക വേണുഗോപാൽ, അഭിഷേക് രവീന്ദ്രൻ, ചന്ദുനാഥ്, ഡയാന ഹമീദ്, ജുവൽ മേരി എന്നിവരും ഈ ചിത്രത്തിന്റെ താരനിരയിൽ ഉണ്ട്.