മുകേഷിന്റെ മാസ്സ് റീ എൻട്രി; പൊട്ടിചിരിപ്പിച്ചു ധമാക്ക മുന്നേറുന്നു

പ്രശസ്ത സംവിധായകൻ ഒമർ ലുലു ഒരുക്കിയ നാലാമത്തെ ചിത്രമായ ധമാക്കയും സൂപ്പർ ഹിറ്റിലേക്ക് കുതിക്കുകയാണ്. വളരെ രസകരമായി ഇന്നത്തെ യുവ തലമുറയിൽ കണ്ടു വരുന്ന ഒരു പ്രശ്നത്തെ അവതരിപ്പിച്ച ഈ ചിത്രം യുവ പ്രേക്ഷകരുടെ പിന്തുണയോടെ ആണ് ഇപ്പോൾ തീയേറ്ററുകളിൽ നിറഞ്ഞോടുന്നത്. അരുൺ, നിക്കി ഗൽറാണി എന്നിവർ നായകനും നായികയും ആയി എത്തിയ ഈ ചിത്രത്തിൽ കയ്യടി നേടുന്നത് മുകേഷും ഉർവശിയും ആണ്. പ്രേക്ഷകരെ പൊട്ടിച്ചിരിപ്പിക്കുന്ന കിടിലൻ തമാശകളുമായി ഒരു മാസ്സ് റീ എൻട്രി തന്നെയാണ് മുകേഷ് ഈ ചിത്രത്തിലൂടെ നടത്തിയിരിക്കുന്നത്. മുകേഷ്- ഉർവശി ടീമിന്റെ കോമഡി ഈ ചിത്രത്തിന്റെ ഹൈലൈറ്റ് തന്നെയാണ്. ഒരിടവേളക്ക് ശേഷം ആണ് ഇത്രയും കോമഡി ചെയ്യുന്ന ഒരു കഥാപാത്രം ആയി പ്രേക്ഷകർ മുകേഷിനെ സ്‌ക്രീനിൽ കാണുന്നതു. നായകന്റെ അച്ഛൻ ആയാണ് മുകേഷ് ഈ ചിത്രത്തിൽ എത്തുന്നത്.

ഇവർക്കൊപ്പം ധർമജൻ ബോൾഗാട്ടി, ഹരീഷ് കണാരൻ, ഇന്നസെന്റ്, ഇടവേള ബാബു, സാബുമോൻ, സലിം കുമാർ, ശാലിൻ സോയ എന്നിവരും നിറഞ്ഞു നിൽക്കുന്ന ഈ ചിത്രം രചിച്ചിരിക്കുന്നത് സാരംഗ് ജയപ്രകാശ്, വേണു ഓ വി, കിരൺ ലാൽ എന്നിവർ ചേർന്ന് ആണ്. എം കെ നാസർ നിർമ്മിച്ചിരിക്കുന്ന ഈ ചിത്രത്തിന് സംഗീതം ഒരുക്കിയത് ഗോപി സുന്ദറും ക്യാമറ ചലിപ്പിച്ചത് സിനോജ് പി അയ്യപ്പനും ആണ്. ആദ്യം മുതൽ അവസാനം വരെ താമാശയിലൂടെ ആണ് ഈ ചിത്രം മുന്നോട്ടു പോകുന്നത്. അതിനൊപ്പം ഒരു ചെറിയ സന്ദേശം നൽകാനും ഈ ചിത്രം ശ്രമിക്കുന്നുണ്ട്. ഏതായാലും തന്റെ പുതിയ ചിത്രവും സൂപ്പർ വിജയമാക്കി മുന്നേറുകയാണ് ഒമർ ലുലു എന്ന സംവിധായകൻ.