മോഹൻലാൽ- മുകേഷ് ടീം വീണ്ടും ഒന്നിക്കുന്നു

മലയാള സിനിമയിലെ ഒരു ഹിറ്റ് ജോഡിയാണ്‌ മോഹൻലാൽ- മുകേഷ് ടീം. ഇവർ ഒന്നിക്കുമ്പോൾ ഉള്ള കോമഡി ടൈമിംഗ് അപാരമാണെന്നു എല്ലാവർക്കുമറിയാം. പ്രിയദർശൻ ചിത്രങ്ങളിലൂടെ പ്രേക്ഷകരെ ഏറെ പൊട്ടിചിരിപ്പിച്ചിട്ടുള്ള ഈ എവർഗ്രീൻ ടീം ഒരിക്കൽ കൂടി ഒന്നിക്കാൻ പോവുകയാണ്. എന്നാൽ ഇത്തവണ ഒരു ചരിത്ര സിനിമയ്ക്കു വേണ്ടിയാണു ഈ ടീം ഒന്നിക്കാൻ പോകുന്നത്. ഒരുപക്ഷെ മുകേഷിന്റെ കരിയറിലെ തന്നെ ഏറ്റവും വലിയ വേഷമായി ഈ ചിത്രത്തിലെ കഥാപാത്രം മാറുകയും ചെയ്യും. മോഹൻലാൽ- പ്രിയദർശൻ ടീം ഒരുക്കുന്ന മരക്കാർ: അറബിക്കടലിന്റെ സിംഹം എന്ന ചിത്രത്തിൽ സാമൂതിരി ആയാണ് മുകേഷ് എത്തുന്നത് എന്നാണ് പുതിയ റിപ്പോർട്ടുകൾ സൂചിപ്പിക്കുന്നത്. മലയാളത്തിലെ ഏറ്റവും വലിയ ചിത്രമായി നൂറു കോടി രൂപ ബഡ്ജറ്റിൽ ആണ് ഈ ചിത്രം ഒരുങ്ങാൻ പോകുന്നത്.

നവംബർ പതിനഞ്ചിനു ഹൈദരാബാദിൽ ഷൂട്ടിംഗ് തുടങ്ങാൻ പോകുന്ന ഈ ചിത്രത്തിന്റെ സെറ്റ് വർക്കുകൾ പ്രൊജക്റ്റ് ഡിസൈനർ ആയ സാബു സിറിളിന്റെ മേൽനോട്ടത്തിൽ നടന്നു വരികയാണ്. മോഹൻലാൽ , മുകേഷ് എന്നിവർക്കൊപ്പം മലയാളത്തിൽ നിന്ന് മഞ്ജു വാര്യർ, മധു, പ്രണവ് മോഹൻലാൽ , സിദ്ദിഖ്, രഞ്ജി പണിക്കർ, നെടുമുടി വേണു എന്നിവരും തമിഴിൽ നിന്ന് അർജുൻ, പ്രഭു തുടങ്ങിയവരും ഹിന്ദിയിൽ നിന്ന് സുനിൽ ഷെട്ടിയും ഉണ്ടാകും ഈ ചിത്രത്തിന്റെ താര നിരയിൽ. പ്രശസ്ത തെന്നിന്ത്യൻ നായികയായ കീർത്തി സുരേഷും പ്രിയദർശന്റെ മകളും തെലുങ്കിലെ നായികയുമായ കല്യാണി പ്രിയദർശനും ഈ ചിത്രത്തിൽ അഭിനയിക്കും.

തിരു കാമറ ചലിപ്പിക്കുന്ന ഈ ചിത്രത്തിന്റെ വി എഫ് എക്സ് വിഭാഗത്തിന് മേൽനോട്ടം വഹിക്കാൻ പോകുന്നത് പ്രിയദർശന്റെ മകൻ ആയ സിദ്ധാർഥ് ആയിരിക്കും.