കുടുംബ പ്രേക്ഷകരുടെ മനസ്സ് നിറക്കാൻ ഇന്ന് മുതൽ പ്യാലിയും കൂട്ടരും

ഒരു കൂട്ടം ബാലതാരങ്ങൾ പ്രധാന കഥാപാത്രങ്ങൾ ചെയ്ത മലയാള ചിത്രമായ പ്യാലി ഇന്ന് മുതൽ കേരളത്തിലെ സ്‌ക്രീനുകളിൽ പ്രദർശനം ആരംഭിച്ചിരിക്കുകയാണ്. ദുൽഖർ സൽമാന്റെ നിർമ്മാണ- വിതരണ ബാനറായ വേഫെറർ ഫിലിംസിന്റെയും അന്തരിച്ചു പോയ നടൻ എൻ എഫ് വർഗീസിന്റെ സ്മരണാർത്ഥമുള്ള എൻ എഫ് വർഗീസ് പിക്ചേഴ്‌സിന്റെയും ബാനറിൽ, ദുൽഖർ സൽമാനും സോഫിയ വർഗീസും ചേർന്ന് നിർമ്മിച്ച പ്യാലിക്കു ഗംഭീര പ്രേക്ഷക പ്രതികരണമാണ് കൊച്ചിയിൽ വെച്ച് നടന്ന പ്രീവ്യൂ ഷോ കഴിഞ്ഞപ്പോൾ ലഭിച്ചത്. കുട്ടികളേയും കുടുംബ പ്രേക്ഷകരേയും ഏറെ ആകർഷിക്കുന്ന ഒരു ചിത്രമാണിതെന്നും, അവർ തീർച്ചയായും കാണേണ്ട ചിത്രമാണിതെന്നും പ്യാലി കണ്ടവർ അഭിപ്രായപ്പെട്ടു. ബാലതാരം ബാർബി ടൈറ്റിൽ വേഷം ചെയ്തിരിക്കുന്ന ഈ ചിത്രം, കഴിഞ്ഞ കേരളാ സംസ്ഥാന ചലച്ചിത്ര അവാർഡിൽ കലാസംവിധാനത്തിനും ബാലതാരത്തിനുമുള്ള അവാർഡുകൾ കരസ്ഥമാക്കിയ മലയാള സിനിമ കൂടിയാണ്.

ജോർജ് ജേക്കബ്, ശ്രീനിവാസൻ, മാമുക്കോയ, അപ്പാനി ശരത്, റാഫി, അൽത്താഫ് സലിം, സുജിത് ശങ്കർ, ആടുകളം മുരുഗദോസ് എന്നിവരും പ്രധാന കഥാപാത്രങ്ങളെ അവതരിപ്പിക്കുന്ന ഈ ചിത്രം, രചിക്കുകയും സംവിധാനം ചെയ്യുകയും ചെയ്തിരിക്കുന്നത് നവാഗതരായ ബബിതയും റിനുവുമാണ്. തെരുവിലെ സഹോദര സ്‌നേഹത്തിന്റെ കഥ പറയുന്ന ഒരു ചിത്രമാണ് പ്യാലി. പ്രശാന്ത് പിള്ളൈ സംഗീതമൊരുക്കിയ ഈ ചിത്രത്തിന് വേണ്ടി ക്യാമറ ചലിപ്പിച്ചത് ജിജു സണ്ണിയും എഡിറ്റ് ചെയ്തത് ദീപു ജോസഫുമാണ്. ഈ ചിത്രത്തിന്റെ മോഷൻ പോസ്റ്റർ, കാരക്ടർ പോസ്റ്ററുകൾ, ടീസർ, ട്രൈലെർ, ടൈറ്റിൽ സോങ്, അനിമേഷൻ വീഡിയോ സോങ് എന്നിവയെല്ലാം വലിയ രീതിയിലാണ് സോഷ്യൽ മീഡിയയുടെ ശ്രദ്ധ പിടിച്ചു പറ്റിയത്.