അന്ന് വിജയ്ക്കൊപ്പം ഇന്ന് പൃഥ്വിരാജിനൊപ്പം; ആ സൂപ്പർഹിറ്റ് ചിത്രത്തെ അനുസ്മരിപ്പിച്ചു പുതിയ ചിത്രം.

യുവ സൂപ്പർ താരം പൃഥ്വിരാജ് സുകുമാരൻ സംവിധാനം ചെയ്യുന്ന രണ്ടാമത്തെ ചിത്രമാണ് ബ്രോ ഡാഡി. പൃഥ്വിരാജ് ഒരുക്കിയ ആദ്യ ചിത്രമായ ലൂസിഫെറിലെ നായകൻ, സൂപ്പർ താരം മോഹൻലാൽ തന്നെയാണ് ഈ ചിത്രത്തിലെയും നായക വേഷം ചെയ്യുന്നത്. മോഹൻലാലിന് ഒപ്പം പൃഥ്വിരാജ് സുകുമാരനും ഈ ചിത്രത്തിലെ ഒരു പ്രധാന വേഷം ചെയ്യുന്നുണ്ട്. അച്ഛനും മകനും ആയാണ് ഇവർ ഇതിൽ അഭിനയിക്കുന്നത്. ഇപ്പോഴിതാ ഈ ചിത്രത്തിലെ പുതിയ ഒരു സ്റ്റിൽ സോഷ്യൽ മീഡിയയിൽ വൈറലാകുന്ന കാഴ്ചയാണ് കാണാൻ സാധിക്കുന്നത്. ഇതിഹാസത്തോടൊപ്പം തോളോട് തോൾ ചേർന്ന് എന്ന കുറിപ്പോടെയാണ് പൃഥ്വിരാജ് ഈ ചിത്രം പങ്കു വെച്ചിരിക്കുന്നത്. മോഹൻലാലിനൊപ്പം ചിരിച്ചു കൊണ്ട് തോൾ ചേർത്തു നിൽക്കുന്ന ചിത്രമാണ് പൃഥ്വിരാജ് പോസ്റ്റ് ചെയ്തത്.

ഇതേ ചിത്രം തന്നെ പൃഥ്വിരാജ് എന്ന നടനോടൊപ്പം എന്ന കുറിപ്പോടെ മോഹൻലാൽ പങ്കു വെച്ചിട്ടുണ്ട്. അതിനു മുൻപ് പൃഥ്വിരാജ് എന്ന സംവിധായകനൊപ്പം എന്ന കുറിപ്പോടെ മറ്റൊരു ചിത്രവും മോഹൻലാൽ പങ്കു വെച്ചിരുന്നു. 7 വർഷം മുൻപ് പുറത്തു വന്ന ജില്ല എന്ന തമിഴ് ചിത്രത്തിലെ മോഹൻലാൽ- വിജയ് പോസ്റ്ററുമായി സാമ്യമുള്ള ഒരു സ്റ്റിൽ ആണ് ഇപ്പോൾ ബ്രോ ഡാഡി ടീമിൽ നിന്ന് വന്നിരിക്കുന്നത്. ആ ചിത്രത്തിലും അവർ അച്ഛനും മകനും ആയാണ് അഭിനയിച്ചത് എന്നതാണ് കൗതുകകരമായ കാര്യം. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ബ്രോ ഡാഡിയുടെ ഷൂട്ടിംഗ് പൂർത്തിയായി കഴിഞ്ഞു. കല്യാണി പ്രിയദർശൻ, മീന, കനിഹ, ലാലു അലക്സ്, ഉണ്ണി മുകുന്ദൻ, മല്ലിക സുകുമാരൻ, ജഗദീഷ്, സൗബിൻ എന്നിവരും ഈ ചിത്രത്തിൽ അഭിനയിക്കുന്നുണ്ട്.