മലയാളത്തിന്റെ ആക്ഷൻ കിംഗിന് ജന്മദിന ആശംസകൾ നേർന്നു മോഹൻലാൽ..!

മലയാള സിനിമയുടെ ആക്ഷൻ കിംഗ് അല്ലെങ്കിൽ ആക്ഷൻ സൂപ്പർ സ്റ്റാർ ആയാണ് സുരേഷ് ഗോപി അറിയപ്പെട്ടിരുന്നത്. തീപ്പൊരി ചിത്രങ്ങളിലൂടെയും കഥാപാത്രങ്ങളിലൂടെയും സൂപ്പർ സ്റ്റാർ പദവി നേടിയെടുത്ത സുരേഷ് ഗോപി തൊണ്ണൂറുകളിൽ മോഹൻലാൽ, മമ്മൂട്ടി എന്നിവർക്കൊപ്പം മലയാള സിനിമ അടക്കിവാണ ഒരു താരം തന്നെയാണ്. കേരളത്തിന് അകത്തും പുറത്തെയും വമ്പൻ മാർക്കറ്റു സ്വന്തമാക്കിയ ഈ താരം ഒരു നടൻ എന്ന നിലയിലും നമ്മളെ വിസ്മയിപ്പിച്ച ചിത്രങ്ങൾ ഏറെ. സുരേഷ് ഗോപി അവതരിപ്പിച്ച ഭരത് ചന്ദ്രൻ ഐ പി എസും, ആനക്കാട്ടിൽ ചാക്കോച്ചിയും നന്ദഗോപാലും കുട്ടപ്പായിയും ഈശോ പണിക്കരും എല്ലാം ഇന്നും പ്രേക്ഷകരുടെ ഹരം ആണ്. ഇന്ന് തന്റെ ജന്മദിനം ആഘോഷിക്കുന്ന മലയാളത്തിന്റെ ഈ ആക്ഷൻ സൂപ്പർ സ്റ്റാറിന് ജന്മദിന ആശംസകളുമായി പതിവ് പോലെ തന്നെ മലയാള സിനിമയുടെ താര ചക്രവർത്തിയും ഇന്ത്യൻ സിനിമയുടെ നടനവിസ്മയവുമായ മോഹൻലാൽ എത്തി.

ഒരുപാട് വർഷങ്ങൾ ആയി സുരേഷ് ഗോപിക്ക് മുടങ്ങാതെ ജന്മദിന ആശംസകൾ അറിയിക്കുന്ന മലയാള താരമാണ് മോഹൻലാൽ എന്നതും ശ്രദ്ധേയമാണ്. അവർ തമ്മിൽ ഉള്ള സൗഹൃദവും അവരുടെ കുടുംബങ്ങൾ തമ്മിൽ നിലനിർത്തുന്ന സ്നേഹവും ഏവർക്കും അറിയാം. ടി പി ബാലഗോപാലൻ എം എ എന്ന മോഹൻലാൽ ചിത്രത്തിലെ ഒരു രംഗത്തിൽ മാത്രം മാത്രം അഭിനയിച്ചു എത്തിയ സുരേഷ് ഗോപി പിന്നീട് മോഹൻലാലിനൊപ്പം വില്ലൻ ആയും സഹനടൻ ആയും എല്ലാം അഭിനയിച്ചിട്ടുണ്ട്. രാജാവിന്റെ മകൻ, ഇരുപതാം നൂറ്റാണ്ട്, മണിച്ചിത്രത്താഴ്, ഗുരു, രക്തസാക്ഷികൾ സിന്ദാബാദ്, ക്രിസ്ത്യൻ ബ്രദേഴ്‌സ്, ട്വന്റി ട്വന്റി എന്നീ മോഹൻലാൽ നായകനായ ചിത്രങ്ങളിൽ സുരേഷ് ഗോപി ഗംഭീര വേഷങ്ങൾ ചെയ്തിട്ടുണ്ട്. സുരേഷ് ഗോപി നായകനായ സമ്മർ ഇൻ ബേത്ലഹേം , ജനകൻ തുടങ്ങിയ ചിത്രങ്ങളിൽ മോഹൻലാൽ അതിഥി വേഷത്തിലും എത്തിയിട്ടുണ്ട്.