മോഹൻലാൽ സംവിധായകനാകുന്നു; ഒരുങ്ങുന്നത് ബിഗ് ബജറ്റ് ചിത്രം..

മലയാള സിനിമയുടെ താര ചക്രവർത്തി മോഹൻലാൽ സംവിധായകൻ ആകുന്നു. മോഹൻലാൽ തന്നെയാണ് തന്റെ പുതിയ ബ്ലോഗിലൂടെ ഈ വാർത്ത പുറത്തു വിട്ടത്. ബറോസ്; ദി ഗാർഡിയൻ ഓഫ് ഗാമാസ് ട്രെഷർ എന്ന് പേരിട്ടിരിക്കുന്ന ഈ ചിത്രം ഒരു 3D ചിത്രമായാവും ഒരുക്കുക. മോഹൻലാൽ തന്നെ ടൈറ്റിൽ റോൾ ചെയ്യുന്ന ഈ ചിത്രത്തിൽ ഒരു കുട്ടിയും പ്രധാന വേഷം ചെയ്യും. ഗോവ ഒരു പ്രധാന ലൊക്കേഷൻ ആയി വരുന്ന ഈ ചിത്രം പോർച്ചുഗീസ്  പശ്ചാത്തലത്തിൽ ആണ് ഒരുങ്ങുക. മലയാളത്തിലെ ഏറ്റവും വലിയ പ്രൊഡക്ഷൻ ബാനർ ആയിരുന്ന നവോദയ മലയാളത്തിലേക്ക് തിരിച്ചു വരുന്നു എന്ന സൂചനയും മോഹൻലാൽ നൽകിയിട്ടുണ്ട്. 

ഇന്ത്യൻ സിനിമയിലെ ആദ്യ 3D ചിത്രവും ആദ്യ 70 MM ചിത്രവും നമ്മുക്ക് സമ്മാനിച്ച ജിജോ ഈ ചിത്രത്തിൽ സഹകരിക്കും എന്നും മോഹൻലാൽ ബ്ലോഗിൽ സൂചന നൽകി. വമ്പൻ ബഡ്ജറ്റിൽ ഒരുങ്ങുന്ന ഈ ചിത്രത്തിൽ വിദേശ അഭിനേതാക്കൾ ആയിരിക്കും കൂടുതൽ ഉണ്ടാവുക. ചിത്രത്തെ കുറിച്ചുള്ള കൂടുതൽ വിവരങ്ങൾ അധികം വൈകാതെ തന്നെ പുറത്തു വിടും. ചിത്രത്തിന്റെ കാസ്റ്റിംഗ് നടക്കുന്നതെ ഉള്ളു എന്നും മോഹൻലാൽ പറയുന്നു. ഒരു ഇന്റർനാഷണൽ ഫിലിം എന്ന രീതിയിൽ ബറോസ് ഒരുക്കുക എന്നതാണ് ലക്‌ഷ്യം എന്നും മോഹൻലാൽ പറഞ്ഞു. ലൂസിഫർ എന്ന അദ്ദേഹത്തിന്റെ പുതിയ ചിത്രം മലയാള സിനിമയിലെ എല്ലാ കളക്ഷൻ റെക്കോർഡുകളും തകർത്തു മുന്നേറുമ്പോൾ ആണ് സംവിധാന രംഗത്തേക്ക് ഉള്ള തന്റെ കടന്നു വരവ് അദ്ദേഹം പ്രഖ്യാപിച്ചത്. അടുത്തതായി അദ്ദേഹം അഭിനയിക്കാൻ പോകുന്നത് ഇട്ടിമാണി എന്ന ചിത്രത്തിൽ ആണ്.