എമ്പുരാൻ കഴിഞ്ഞു ആ തെലുങ്ക് പാൻ ചിത്രത്തിലേക്ക് മോഹൻലാൽ

മലയാളത്തിന്റെ മഹാനടൻ മോഹൻലാൽ ഇപ്പോൾ തന്റെ ബ്രഹ്മാണ്ഡ ചിത്രമായ എമ്പുരാൻ തീർക്കുന്ന തിരക്കിലാണ്. ഡിസംബർ ആദ്യ വാരത്തിലാണ് പൃഥ്വിരാജ് ഒരുക്കുന്ന എമ്പുരാന്റെ ഷൂട്ടിംഗ് പൂർത്തിയാവുക. ബ്ലോക്ക്ബസ്റ്റർ ചിത്രമായ ലൂസിഫറിന്റെ രണ്ടാം ഭാഗമായ ഈ ചിത്രം അടുത്ത വർഷം മാർച്ചിലാണ്‌ ആഗോള റിലീസായി എത്തുക.

എമ്പുരാൻ പൂർത്തിയാക്കിയാൽ ഉടൻ തന്നെ മോഹൻലാൽ തന്റെ പാൻ ഇന്ത്യൻ തെലുങ്ക് ചിത്രമായ ഋഷഭയിൽ ജോയിൻ ചെയ്യുമെന്നാണ് റിപ്പോർട്ടുകൾ വരുന്നത്. കഴിഞ്ഞ വർഷം ചിത്രീകരണം ആരംഭിച്ച ഈ ചിത്രം ആദ്യ ഷെഡ്യൂളിന് ശേഷം ചില സാങ്കേതികമായ കാരണങ്ങളാൽ ഷൂട്ടിംഗ് നിർത്തി വെച്ചിരുന്നു. ഏറ്റവും പുതിയ വിവരങ്ങൾ പ്രകാരം ഈ ഡിസംബറിൽ ചിത്രം പുനരാരംഭിക്കും. അതിലെ തന്റെ ഭാഗങ്ങൾ മോഹൻലാൽ അടുത്ത മാസം അവസാനത്തോടെ തീർക്കുമെന്നാണ് സൂചന.

അതിനു ശേഷമായിരിക്കും മോഹൻലാൽ പുതിയ ചിത്രമായ ഹൃദയപൂർവ്വത്തിൽ ജോയിൻ ചെയ്യുക. സത്യൻ അന്തിക്കാട് ആണ് ഹൃദയപൂർവം ഒരുക്കുന്നത്. ഡിസംബർ 25 നാണു മോഹൻലാൽ ആദ്യമായി സംവിധാനം ചെയ്ത ബറോസ് എന്ന ത്രീഡി ഫാന്റസി ചിത്രം റിലീസ് ചെയ്യുന്നത്. അതിന്റെ റിലീസിന് ശേഷം പൂനെയിൽ ആരംഭിക്കുന്ന സത്യൻ ചിത്രത്തിൽ ജോയിൻ ചെയ്യാനാണ് മോഹൻലാലിൻറെ പ്ലാൻ എന്നറിയുന്നു.

കന്നഡ സംവിധായകൻ നന്ദ കിഷോർ സംവിധാനം ചെയ്യുന്ന ഋഷഭ വംമ്പൻ ബഡ്ജറ്റിൽ ഒരുങ്ങുന്ന ഒരു പീരീഡ് ആക്ഷൻ ചിത്രമാണ്. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിലായി ഒരുക്കുന്ന ചിത്രം എവിഎസ് സ്റ്റുഡിയോസ്, ഫസ്റ്റ് സ്റ്റെപ്പ് മൂവീസ്, ബാലാജി ടെലിഫിലിംസ്, കണക്റ്റ് മീഡിയ എന്നീ ബാനറുകളിൽ അഭിഷേക് വ്യാസ്, വിശാല്‍ ഗുര്‍നാനി, ജൂഹി പരേഖ് മെഹ്ത, ശ്യാം സുന്ദര്‍, ഏക്ത കപൂര്‍, ശോഭ കപൂര്‍, വരുണ്‍ മാതൂര്‍ എന്നിവര്‍ ചേർന്നാണ് നിർമ്മിക്കുന്നത്.