മോഹൻലാലും സൂര്യയും ഒന്നിക്കുന്നു; തമിഴിൽ ഒരുങ്ങുന്നത് വമ്പൻ ചിത്രം..!

ഇന്ത്യൻ സിനിമയുടെ നടനവിസ്മയവും മലയാള സിനിമയുടെ താര ചക്രവർത്തിയുമായ മോഹൻലാൽ വീണ്ടും തമിഴിലേക്ക്. ഇത്തവണ മോഹൻലാലിനൊപ്പം തമിഴകത്തിന്റെ താര സൂര്യനായ സുര്യയുമുണ്ട്. മോഹൻലാൽ- സൂര്യ ടീം ഒന്നിക്കുന്ന ബിഗ് ബജറ്റ് തമിഴ് ചിത്രം സംവിധാനം ചെയ്യുന്നത് പ്രശസ്ത ക്യാമറാമാനും സംവിധായകനുമായ കെ വി ആനന്ദ് ആണ്. എന്തിരൻ 2 പോലത്തെ വമ്പൻ ചിത്രങ്ങളുടെ നിർമ്മാതാക്കളായ ലൈക്ക പ്രൊഡക്ഷൻസ് നിർമ്മിക്കുന്ന ഈ ചിത്രത്തിന്റെ കൂടുതൽ വിവരങ്ങൾ വരുന്ന ദിവസങ്ങളിൽ പുറത്തു വരും. സൂര്യ ഇപ്പോൾ സെൽവ രാഘവൻ ചിത്രത്തിൽ അഭിനയിക്കുകയാണ്. മോഹൻലാൽ ആണെങ്കിൽ രഞ്ജിത് ചിത്രം, പ്രിത്വി രാജിന്റെ ലൂസിഫർ തുടങ്ങി മറ്റു വമ്പൻ ചിത്രങ്ങളിൽ ആണ് അഭിനയിക്കാൻ പോകുന്നത്. അടുത്ത വർഷം ആദ്യം ആയിരിക്കും മോഹൻലാൽ- സൂര്യ ചിത്രം തുടങ്ങുക എന്നാണ് സൂചന.

മോഹൻലാൽ- സൂര്യ ടീം ഒന്നിക്കുന്ന വിവരം സംവിധായകൻ കെ വി ആനന്ദും ലൈക്ക പ്രൊഡക്ഷന്സും ഒഫീഷ്യൽ ആയി തന്നെ തങ്ങളുടെ ട്വിറ്റെർ അക്കൗണ്ടിലൂടെ അറിയിച്ചു. സൂര്യ ഈ വാർത്ത റീട്വീറ്റ് ചെയ്തിട്ടും ഉണ്ടെന്നത് വാർത്തകൾ കൂടുതൽ ഔദ്യോകികമാക്കി. വമ്പൻ ചിത്രങ്ങളാണ് ഇപ്പോൾ മോഹൻലാലിനെ തേടി എത്തുന്നത്. ഒടിയൻ, ലൂസിഫർ, നീരാളി, കായംകുളം കൊച്ചുണ്ണി , കുഞ്ഞാലി മരക്കാർ, രണ്ടാമൂഴം, കെ വി ആനന്ദ് – സൂര്യ ചിത്രം തുടങ്ങി ആരും വിസ്മയിച്ചു പോകുന്ന വമ്പൻ ചിത്രങ്ങളുടെ നീണ്ട നിരയാണ് മോഹൻലാലിന് സ്വന്തമായുള്ളത്. ഏതായാലും മോഹൻലാൽ ആരാധകരും സൂര്യ ആരാധകരും ആഘോഷം തുടങ്ങി കഴിഞ്ഞു. നടിപ്പിൻ നായകനൊപ്പം നടനവിസ്മയം എത്തുമ്പോൾ വെള്ളിത്തിരയിലും വിസ്മയം വിരിയുമെന്നുറപ്പ് . അയൻ, കോ , മാട്രാൻ, കാവൻ എന്നീ ചിത്രങ്ങൾ സംവിധാനം ചെയ്തിട്ടുള്ള ആളാണ് കെ വി ആനന്ദ് . മോഹൻലാൽ- പ്രിയദർശൻ ടീമിന്റെ തേന്മാവിൻ കൊമ്പത് എന്ന ബ്ലോക്ക്ബസ്റ്റർ ചിത്രത്തിന്റെ ക്യാമറാമാനും കെ വി ആനന്ദ് ആയിരുന്നു.