‘L353’ മോഹൻലാലിനൊപ്പമുള്ള ഒരു ഫാൻബോയ് ചിത്രമായിരിക്കും: സംവിധായകൻ വിവേക് പറയുന്നു

മോഹൻലാലിനെ കേന്ദ്ര കഥാപാത്രമാക്കിയുള്ള ഒരു ഫാൻബോയ് ചിത്രമായിരിക്കും താൻ അടുത്തതായി ചെയ്യാൻ പോവുന്നതെന്ന് സംവിധായകൻ വിവേക്. അമലാ പോൾ നായികയായെത്തുന്ന ‘ടീച്ചർ’ എന്ന തന്റെ പുതിയ ചിത്രത്തിന്റെ പ്രമോഷന്റെ ഭാഗമായി നടന്ന പ്രസ്സ് മീറ്റിൽ വെച്ചാണ് വിവേക് ഇക്കാര്യം വെളിപ്പെടുത്തിയത്. ലിജോ ജോസ് പെല്ലിശ്ശേരിയുടെ മോഹൻലാൽ ചിത്രത്തിനും, എംപുരാനും ശേഷം ‘L353’ ആരംഭിക്കും എന്നും വിവേക് കൂട്ടിച്ചേർത്തു. ‘L353’യുടെ അപ്ഡേറ്റുകൾ ലഭിക്കാതിരുന്ന സാഹചര്യത്തിൽ വിവേക് ‘L353’ ഉപേക്ഷിച്ചു എന്ന രീതിയിൽ വാർത്തകൾ പരന്നിരുന്നു. എന്നാൽ ഇപ്പോൾ ‘എമ്പുരാൻ’ ശേഷം ‘L353’ ആരംഭിക്കുമെന്ന് വിവേക് തുറന്നു പറഞ്ഞിരിക്കുകയാണ്. മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്ത ‘ലൂസിഫർ’ന്റെ രണ്ടാം ഭാഗമാണ് ‘എമ്പുരാൻ’.

സംവിധായകൻ വിവേകിന്റെ വാക്കുകൾ ഇങ്ങനെ: “L353 അനൗൺസ് ചെയ്ത ഒരു പ്രൊജക്ടാണ്. അതിന്റെ നിർമ്മാതാക്കൾ ഇപ്പോൾ ചെയ്തുകൊണ്ടിരിക്കുന്നത് ലിജോ ചേട്ടന്റെ പടമാണ്. അതിന് ശേഷം എമ്പുരാനാണ്. അതിന് ശേഷമാണ് L353. ലാലേട്ടന്റെ പെർഫോർമൻസ് കണ്ടപ്പോഴാണ് എനിക്ക് ശരിക്കും സിനിമയിലേക്ക് വരണം സിനിമ ചെയ്യണം എന്നൊക്കെ തോന്നിയത്. ഒരു ഘട്ടത്തിൽ അദ്ദേഹത്തിന്റെ കൂടെ ഒരു പരസ്യം ചെയ്യാൻ എനിക്ക് ‍സാധിച്ചിരുന്നു. ആ എക്സ്പീരിയൻസ് വെച്ചിട്ടാണ് എനിക്കൊരു പോസിബിളിറ്റി കിട്ടിയത്. ഞാൻ അത് എക്സ്പ്ലോർ ചെയ്തു. ആ എക്സ്പ്ലോറേഷന്റെ ഭാഗമായിട്ടാണ് ഇപ്പൊൾ ഇങ്ങനെ ഒരു ചിത്രം വരുന്നത്. പൂർണ്ണമായും ഇതൊരു ഫാൻബോയ് ചിത്രമാണ്. അതിലൊരു സംശയവും വേണ്ട.”

5 വർഷത്തിന് ശേഷം അമലാ പോൾ മലയാള സിനിമയിലേക്ക് തിരിച്ചെത്തുന്ന ചിത്രമാണ് ‘ടീച്ചർ’. വിവേക് സംവിധാനം ചെയ്ത ഈ ചിത്രത്തിന്റെ പ്രെസ്സ് മീറ്റ് പാലാരിവട്ടം മൺസൂൺ ഏംപ്രെസ് ഹോട്ടലിൽ വെച്ചാണ് നടന്നത്. അമലാ പോൾ, വിവേക് എന്നിവരോടൊപ്പം ചെമ്പൻ വിനോദ്, മഞ്ജു പിള്ളൈ, ഹക്കീം ഷാ, അനുമോൾ എന്നിവരും പ്രെസ്സ് മീറ്റിൽ പങ്കെടുത്തു. പി വി ഷാജി കുമാർ, വിവേക് എന്നിവർ ചേർന്ന് തിരക്കഥയും സംഭാഷണവും ഒരുക്കിയ ചിത്രം ഒരു സസ്‌പെൻസ് ത്രില്ലറാണ്.