മമ്മൂക്കയെ വെച്ച് സിനിമ ചെയ്യാൻ താല്പര്യം കൂടുതലാണ്: സൗബിൻ ഷാഹിർ

മലയാളത്തിലെ പ്രശസ്ത നടനും സംവിധായകനുമായ സൗബിൻ ഷാഹിർ തന്റെ രണ്ടാമത്തെ സംവിധാന സംരംഭമായി പ്രഖ്യാപിച്ച ചിത്രമായിരുന്നു ദുൽഖർ സൽമാൻ നായകനായ ഓതിരം കടകം. ദുൽഖർ തന്നെ നിർമ്മിക്കാനിരുന്ന ചിത്രം കൂടിയാണിത്. ഈ വർഷം മെയ് മാസത്തിൽ ഷൂട്ടിംഗ് ആരംഭിക്കാനിരുന്ന ഈ ചിത്രം ചില സാങ്കേതിക കാരണങ്ങളാൽ പിന്നീട് ഉപേക്ഷിക്കപ്പെടുകയായിരുന്നു. ഇപ്പോഴിതാ തന്റെ രണ്ടാം സംവിധാന സംരംഭം അടുത്ത വർഷം ആരംഭിക്കുമെന്ന് വെളിപ്പെടുത്തിയിരിക്കുകയാണ് സൗബിൻ ഷാഹിർ. ചിത്രത്തിലെ പ്രധാന വേഷം ആര് ചെയ്യുമെന്ന് ഉറപ്പിച്ചു പറഞ്ഞില്ലെങ്കിലും, ദുൽഖർ സൽമാൻ തന്നെയായിരിക്കും അതിൽ നായകനെന്ന ഒരു സൂചന സൗബിൻ നൽകിയിട്ടുണ്ട്. തിരക്കഥ മാറി വരുന്നതിന് അനുസരിച്ചാണ് പ്രധാന കഥാപാത്രം ആര് ചെയ്യുമെന്ന് തീരുമാനിക്കുക എന്നും സൗബിൻ പറയുന്നു.

സൗബിനൊപ്പം സിനിമ ചെയ്യാനുള്ള ആഗ്രഹം മമ്മൂട്ടി പ്രകടിപ്പിച്ചതിനെ കുറിച്ച് ചോദിച്ചപ്പോൾ സൗബിൻ പറയുന്നത്, മമ്മുക്കക്ക് നമ്മുടെ കൂടെ ജോലി ചെയ്യാനുള്ളതിലും കൂടുതൽ ആഗ്രഹവും താല്പര്യവും നമ്മുക്ക് മമ്മുക്കയെ വെച്ച് ചിത്രം ചെയ്യാനുണ്ടെന്നും, അത് ഭാവിയിൽ നടക്കുമെന്നാണ് പ്രതീക്ഷയെന്നുമാണ്. ഷെയിൻ നിഗം നായകനായ പറവ എന്ന ചിത്രമാണ് സൗബിൻ ആദ്യമായി ചെയ്തത്. അതിൽ ദുൽഖർ സൽമാൻ നിർണ്ണായകമായ ഒരു അതിഥി വേഷം ചെയ്തിരുന്നു. മമ്മൂട്ടി നായകനായ ചെറുകഥ എന്നൊരു ചിത്രമൊരുക്കാനുള്ള തന്റെ ആഗ്രഹത്തെ കുറിച്ച് സൗബിൻ നേരത്തെ വെളിപ്പെടുത്തിയിട്ടുണ്ട്. മൈൻഡ് ഗെയിം ഒക്കെ പ്രമേയമായി വരുന്ന ആ ചിത്രമായിരുന്നു താൻ ആദ്യം ഒരുക്കാൻ പ്ലാൻ ചെയ്തത് എന്നും സൗബിൻ പറഞ്ഞിരുന്നു. രോമാഞ്ചം ഉൾപ്പെടെ സൗബിൻ നായകനായ ഒരുപിടി ചിത്രങ്ങൾ ഇപ്പോൾ റിലീസിനൊരുങ്ങുന്നുമുണ്ട്.