തമിഴ് ചിത്രത്തിൽ ഇന്ത്യൻ പ്രധാന മന്ത്രി ആയി മോഹൻലാൽ; കഥാപാത്രത്തിന്റെ പേരും പുറത്തു..!

കെ വി ആനന്ദ് ഒരുക്കുന്ന തമിഴ് ചിത്രത്തിൽ കേന്ദ്ര കഥാപാത്രത്തെ അവതരിപ്പിക്കുകയാണ് കമ്പ്ലീറ്റ് ആക്ടർ മോഹൻലാൽ ഇപ്പോൾ. സൂര്യയും മോഹൻലാലും നായകന്മാരായി എത്തുന്ന ഈ ചിത്രം വമ്പൻ ബഡ്ജറ്റിൽ ഒരുക്കുന്നത് ലൈക്ക പ്രൊഡക്ഷൻസ് ആണ്. ഈ ചിത്രത്തിലെ മോഹൻലാൽ അവതരിപ്പിക്കുന്ന കഥാപാത്രം ഏതെന്ന രീതിയിൽ ഒരുപാട് ഊഹാപോഹങ്ങൾ സോഷ്യൽ മീഡിയയിൽ വന്നിരുന്നു എങ്കിലും ഇപ്പോൾ അദ്ദേഹത്തിന്റെ കഥാപാത്രം എന്തെന്നും ആ കഥാപാത്രത്തിന്റെ പേരും പുറത്തു വന്നിരിക്കുകയാണ്. ഇന്ത്യൻ പ്രധാന മന്ത്രിയുടെ വേഷത്തിൽ ആണ് മോഹൻലാൽ ഈ ചിത്രത്തിൽ അഭിനയിക്കുന്നത്..

ചന്ദ്രകാന്ത് വർമ്മ എന്നാണ് ഈ ചിത്രത്തിലെ മോഹൻലാൽ കഥാപാത്രത്തിന്റെ പേര്. അദ്ദേഹത്തിന്റെ ബോഡി ഗാർഡ് ആയി സൂര്യ എത്തുന്ന ഈ ചിത്രം ഇന്ത്യൻ പ്രധാന മന്ത്രിയും അദ്ദേഹത്തിന്റെ അംഗ രക്ഷകനും തമ്മിലുള്ള ബന്ധത്തിന്റെ പശ്ചാത്തലത്തിൽ ഒരുക്കുന്ന മാസ്സ് പൊളിറ്റിക്കൽ എന്റെർറ്റൈനെർ ആണ്

മോഹൻലാൽ ഇപ്പോൾ അഭിനയിച്ചു കൊണ്ടിരിക്കുന്ന മലയാള ചിത്രമായ ലുസിഫെറിലും രാഷ്ട്രീയ നേതാവാണ്. സ്റ്റീഫൻ നെടുമ്പള്ളി എന്ന കഥാപാത്രത്തെയാണ് മോഹൻലാൽ ഈ ചിത്രത്തിൽ അവതരിപ്പിക്കുന്നത്. മോഹൻലാൽ- സൂര്യ ചിത്രത്തിൽ ബോളിവുഡ് താരം ബോമൻ ഇറാനിയും തമിഴ് യുവ താരം ആര്യയും പ്രധാന വേഷങ്ങൾ ചെയ്യുന്നുണ്ട്. ബോളിവുഡ്- തമിഴ് നടി സായ്‌യേഷ ആണ് ഈ ചിത്രത്തിൽ നായികാ വേഷം ചെയ്യുന്നത്.

ചിത്രത്തിലെ മോഹൻലാലിന്റേയും സൂര്യയുടെയും ലുക്കുകൾ ഇപ്പോഴേ സോഷ്യൽ മീഡിയയിൽ വൈറൽ ആണ്. സാൾട് ആൻഡ് പേപ്പർ ലുക്കിൽ ആണ് മോഹൻലാൽ ഈ ചിത്രത്തിൽ പ്രത്യക്ഷപ്പെടുന്നത്. ഇപ്പോൾ മോഹൻലാലിൻറെ കഥാപാത്രം എന്തെന്നും കഥാപാത്രത്തിന്റെ പേരും പുറത്തു വന്നത് ഒരു ലൊക്കേഷൻ ചിത്രത്തിൽ നിന്നാണ്. മോഹൻലാൽ അവതരിപ്പിക്കുന്ന പ്രധാന മന്ത്രിയെ സ്വീകരിക്കാൻ ഒരുക്കിയിരിക്കുന്ന ഒരു ഫ്ലെക്സിന്റെ ചിത്രമാണ് പുറത്തു വന്നിരിക്കുന്നത്. കുളു- മണാലിയിൽ ആണ് ഇപ്പോൾ ചിത്രം ഷൂട്ട് ചെയ്തു കൊണ്ടിരിക്കുന്നത്.