ഫെഫ്കക്ക് വേണ്ടി ജീത്തു ജോസെഫ്-രഞ്ജി പണിക്കർ ടീം ഒരുക്കുന്ന ചിത്രത്തിൽ നായകൻ മോഹൻലാലോ മമ്മൂട്ടിയോ..?

മലയാള സിനിമയിലെ സാങ്കേതിക പ്രവർത്തകരുടെ സംഘടനയായ ഫെഫ്കയിൽ പുതിയ ഭാരവാഹികൾ സ്ഥാനമേറ്റതു കഴിഞ്ഞ ദിവസമാണ്. അതിനോട് അനുബന്ധിച്ചു എറണാകുളം ടൌൺ ഹാളിൽ വെച്ച് നടന്ന ഫെഫ്ക ഡയറക്ടർസ് യൂണിയന്റെ ജനറൽ ബോഡി യോഗത്തിൽ വെച്ച് ഒരു സിനിമയുടെ പ്രഖ്യാപനം ഉണ്ടായി. ഫെഫ്ക ഡയറക്ടർസ് യൂണിയൻ നിർമ്മിക്കുന്ന ചിത്രമാണത്. പ്രശസ്ത സംവിധായകനും ഫെഫ്കയുടെ പുതിയ വൈസ് പ്രെസിഡന്റുമായ ജീത്തു ജോസെഫ് സംവിധാനം ചെയ്യുന്ന ഈ ചിത്രത്തിൽ മലയാളത്തിലെ ഒരു സൂപ്പർ താരം ആയിരിക്കും നായകൻ എന്നാണ് പറഞ്ഞിരിക്കുന്നത്. രഞ്ജി പണിക്കർ തിരക്കഥ ഒരുക്കുന്ന ഈ മാസ്സ് എന്റെർറ്റൈനെറിൽ മോഹൻലാൽ ആണോ മമ്മൂട്ടി ആണോ നായക വേഷത്തിൽ എത്തുക എന്നതാണ് ഇപ്പോൾ സോഷ്യൽ മീഡിയയിൽ നടക്കുന്ന ചർച്ച. 

രഞ്ജി പണിക്കരുടെ നേതൃത്വത്തിൽ ആണ് ഫെഫ്കയുടെ പുതിയ ഭരണ  സമിതിക്കു രൂപം കൊടുത്തിരിക്കുന്നത്. നേരത്തെ ബി ഉണ്ണികൃഷ്ണൻ- സിബി  മലയിൽ എന്നിവരായിരുന്നു ഫെഫ്കയുടെ തലപ്പത്തു. സിനിമ നിർമ്മിക്കുന്നതിന് പുറമെ സംഘടനക്ക് വേണ്ടി ധനം സമാഹരിക്കാൻ സംവിധായകൻ സിദ്ദിഖ് സംവിധാനം ചെയ്യുന്ന ചാനൽ പ്രോഗ്രാമും അതുപോലെ താര സംഘടനയായ അമ്മയുമായി സഹകരിച്ചു സ്റ്റേജ് ഷോയും സംഘടിപ്പിക്കും. പെൻഷൻ, സൗജന്യ മെഡിക്കൽ ഇൻഷുറൻസ്, ചികിത്സാ സഹായം, കുടുംബങ്ങൾക്കുള്ള മരണാനന്തര സഹായം  തുടങ്ങി ഒട്ടേറെ ആവശ്യങ്ങൾക്കായി അറുപതു ലക്ഷത്തിൽ അധികം രൂപ കഴിഞ്ഞ രണ്ടു വർഷത്തിനുള്ളിൽ സംഘടന ചെലവിട്ടിരുന്നു. അതിനിയും തുടർന്ന് പോകാൻ വേണ്ടിയാണു ഇപ്പോൾ ധനം സമാഹരിക്കാൻ ഉള്ള ഈ നീക്കങ്ങൾ നടത്തുന്നത്. രഞ്ജി പണിക്കർ പുതിയ പ്രസിഡന്റ് ആയും ജി എസ് വിജയൻ പുതിയ ജനറൽ സെക്രട്ടറി ആയും സ്ഥാനമേറ്റു. സലാം ബാപ്പു ആണ് ട്രെഷറർ.