നീണ്ട മുപ്പത്തിനാല് വർഷങ്ങൾക്കു ശേഷം മോഹൻലാലും നദിയ മൊയ്ദുവും നീരാളിയിലൂടെ വീണ്ടും ഒന്നിക്കുന്നു..

ഫാസിൽ സംവിധാനം ചെയ്ത നോക്കെത്താ ദൂരത്തു കണ്ണും നട്ട് എന്ന ചിത്രം മലയാളികൾ ഒരിക്കലും മറക്കില്ല. മോഹൻലാൽ, നദിയ മൊയ്തു എന്നിവർ പ്രധാന വേഷങ്ങളിൽ എത്തിയ ഈ ചിത്രം 1984 ലെ ബ്ലോക്ക്ബസ്റ്റർ വിജയങ്ങളിൽ ഒന്നായിരുന്നു. ഈ ചിത്രത്തിലെ ഗേളി എന്ന കഥാപാത്രം നദിയക്കു നേടി കൊടുത്ത പ്രശസ്തി ചെറുതല്ല. മോഹൻലാലും ഒത്തുള്ള ഈ നടിയുടെ കെമിസ്ട്രിയും ഏറെ ശ്രദ്ധിക്കപ്പെട്ടു എങ്കിലും പിന്നീട് ഇവർ ഒരുമിച്ചുള്ള ചിത്രങ്ങൾ ഉണ്ടായില്ല. ഇപ്പോഴിതാ നീണ്ട മുപ്പത്തിനാല് വർഷങ്ങൾക്കു ശേഷം ഈ അഭിനയ പ്രതിഭകൾ ഒന്നിച്ചു എത്തുകയാണ് പ്രേക്ഷകരുടെ മുന്നിലേക്ക്. അജോയ് വർമ്മ സംവിധാനം ചെയ്ത നീരാളി എന്ന ത്രില്ലർ ചിത്രത്തിലൂടെ ആണ് ഇവർ ഒരുമിച്ചു എത്തുന്നത്.

കഴിഞ്ഞ ദിവസം ഷൂട്ടിംഗ് അവസാനിച്ച ഈ ചിത്രത്തിൽ മോഹൻലാലിന്റെ ഭാര്യ വേഷത്തിൽ ആണ് നദിയ എത്തുന്നത് എന്നാണ് സൂചന. മോഹൻലാലും നദിയയും ഒരുമിച്ചുള്ള ഈ ചിത്രത്തിലെ ഒരു സ്റ്റിൽ ഇതിനോടകം സോഷ്യൽ മീഡിയയുടെ ശ്രദ്ധ നേടി കഴിഞ്ഞു. സണ്ണി എന്ന കഥാപാത്രത്തെ ആണ് മോഹൻലാൽ ഈ ചിത്രത്തിൽ അവതരിപ്പിക്കുന്നത്.

മൂൺ ഷോട്ട് എന്റർടൈന്മെന്റിന്റെ ബാനറിൽ സന്തോഷ് ടി കുരുവിള, ജോണ് തോമസ്, മെബു നെറ്റിക്കാടൻ എന്നിവർ ചേർന്ന് നിർമ്മിച്ച ഈ ചിത്രം രചിച്ചത് നവാഗതനായ സാജു തോമസ് ആണ്. സുരാജ് വെഞ്ഞാറമൂട്, ദിലീഷ് പോത്തൻ, നാസർ, പാർവതി നായർ എന്നിവരും ഈ ചിത്രത്തിന്റെ താര നിരയുടെ ഭാഗം ആണ്. സ്റ്റീഫൻ ദേവസ്സി സംഗീതം പകർന്ന ഈ ചിത്രത്തിന് ദൃശ്യങ്ങൾ ഒരുക്കിയത് ബോളിവുഡ് ക്യാമറാമാൻ ആയ സന്തോഷ് തുണ്ടിയിൽ ആണ്.