മോഹൻലാലിൻറെ മഹാഭാരത്തിൽ ഹോളിവുഡ് സർപ്രൈസുകളും ഒളിപ്പിച്ച് സംവിധായകൻ..!

ഏഷ്യൻ സിനിമയിലെ തന്നെ ഏറ്റവും വലിയ മുതൽ മുടക്കുള്ള ചിത്രമായി ഒരുങ്ങാൻ പോകുന്ന ചിത്രമാണ് ആയിരം കോടി മുതൽ മുടക്കിൽ ഒരുക്കുന്ന മഹാഭാരത. എം ടി വാസുദേവൻ നായരുടെ ഇതിഹാസ നോവൽ ആയ രണ്ടാമൂഴത്തെ അധികരിച്ചു അദ്ദേഹം തന്നെ തിരക്കഥ രചിച്ച ഈ ചിത്രം സംവിധാനം ചെയ്യാൻ പോകുന്നത് വി എ ശ്രീകുമാർ മേനോൻ ആണ്. ഒരുപക്ഷെ ഇന്ത്യൻ സിനിമയിലെ തന്നെ ജീവിച്ചിരിക്കുന്ന ഏറ്റവും മികച്ച നടൻ എന്ന വിശേഷിപ്പിക്കപ്പെടുന്ന, മലയാള സിനിമയുടെ താര ചക്രവർത്തിയായ മോഹൻലാൽ ആണ് ഈ ചിത്രത്തിലെ നായക വേഷം അവതരിപ്പിക്കുന്നത് . മോഹൻലാലിനൊപ്പം ഇന്ത്യൻ സിനിമയിലെ മറ്റു അനേകം സൂപ്പർ താരങ്ങളും ഈ ചിത്രത്തിൽ അണി നിരക്കും എന്ന് റിപ്പോർട്ടുകൾ ഉണ്ട്. ഒരു ഇന്റർനാഷണൽ കാസ്റ്റിംഗ് ഏജൻസി ആണ് ഈ ചിത്രത്തിലെ താര നിർണ്ണയം നടത്തുന്നത്.

താര നിർണ്ണയം ഇപ്പോൾ അവസാന ഘട്ടത്തിൽ ആണെന്നും, ഈ ചിത്രത്തിൽ പൃഥ്വിരാജ്, അജയ് ദേവ്‌ഗൺ, മഹേഷ് ബാബു, അമിതാബ് ബച്ചൻ, നാഗാർജുന എന്നിവരും ഹോളിവുഡ് ആക്ഷൻ സ്റ്റാർ ജാക്കി ചാനും ഉണ്ടാകുമെന്നുമൊക്കെ സ്ഥിതീകരിക്കാത്ത റിപ്പോർട്ടുകൾ വരുന്നുണ്ട്. ഈ സാഹചര്യത്തിൽ ആണ് ഒരു മീഡിയ ഇന്റർവ്യൂവിൽ സംവിധായകൻ ശ്രീകുമാർ മേനോൻ ഇതിനെ കുറിച്ച് പ്രതികരിച്ചത്. തനിക്കു ഇപ്പോൾ കോൺട്രാക്ട് പ്രകാരം ഇതിനെ കുറിച്ച് പറയാൻ അനുവാദം ഇല്ലെന്നു അദ്ദേഹം വെളിപ്പെടുത്തി. എന്നാൽ ഈ ചിത്രത്തിൽ ഇന്ത്യൻ സിനിമയിലെ വമ്പൻ താരങ്ങൾ മാത്രമല്ല ഹോളിവുഡിൽ നിന്നുള്ള സർപ്രൈസുകളും തങ്ങൾ ഒരുക്കിയിട്ടുണ്ട് എന്ന സൂചന അദ്ദേഹം തന്നു. ഏതായാലും ലോക സിനിമയ്ക്കു മുന്നിലേക്ക് ഇന്ത്യൻ സിനിമയിൽ നിന്ന് സമർപ്പിക്കപ്പെടുന്ന ഒരു ഇതിഹാസ ചിത്രം തന്നെയായി മാറും മഹാഭാരത എന്ന് അദ്ദേഹം വിശ്വസിക്കുന്നു. അടുത്ത വർഷം ചിത്രീകരണം തുടങ്ങാൻ പാകത്തിനാണ് മഹാഭാരതയുടെ പ്രീ-പ്രൊഡക്ഷൻ ജോലികൾ പുരോഗമിക്കുന്നത്.