മോഹൻലാൽ – ലിജോ ജോസ് പെല്ലിശ്ശേരി ടീം വീണ്ടും ?

മലയാളത്തിന്റെ മഹാനടൻ മോഹൻലാലും, മലയാള സിനിമയിൽ വ്യത്യസ്ത ശൈലിയിലൂടെ കഥ പറഞ്ഞ് കൊണ്ട് ലോക ശ്രദ്ധയാകർഷിച്ച സംവിധായകൻ ലിജോ ജോസ് പെല്ലിശേരിയും വീണ്ടും കൈകോർക്കുന്നതായി വാർത്തകൾ. ഇരുവരും ആദ്യമായി ഒന്നിച്ച ‘ മലൈക്കോട്ടൈ വാലിബൻ’ എന്ന ചിത്രം ഈ വർഷം ആദ്യമാണ് റിലീസ് ചെയ്തത്. സമ്മിശ്ര പ്രതികരണം നേടിയ ഈ ചിത്രത്തിന് ബോക്സ് ഓഫീസിൽ വലിയ ചലനങ്ങൾ സൃഷ്ടിക്കാൻ സാധിച്ചില്ലെങ്കിലും, കഥ പറഞ്ഞതിലെ വ്യത്യസ്തത കൊണ്ടും അമ്പരപ്പിക്കുന്ന പരീക്ഷണ സ്വഭാവം കൊണ്ടും കേരളത്തിന് അകത്തും പുറത്തുമുള്ള നിരൂപകരുടെ കയ്യടി നേടാൻ സാധിച്ചു.

ഒരു രണ്ടാം ഭാഗം ഉണ്ടാകാനുള്ള സാധ്യതയും തുറന്നിട്ട് കൊണ്ടാണ് ലിജോ ഈ ചിത്രം അവസാനിപ്പിച്ചത്. എന്നാൽ ഇപ്പോഴിതാ, മറ്റൊരു പുതിയ ചിത്രവുമായി ഈ കൂട്ടുകെട്ട് ഒന്നിക്കാനുള്ള സാധ്യതയുണ്ടെന്ന വാർത്തകളാണ് വരുന്നത്. ഇത്തവണ ഒരു പക്കാ മാസ്സ് ആക്ഷൻ കൊമേർഷ്യൽ ചിത്രം ചെയ്യാനുള്ള ഒരുക്കത്തിലാണ് ലിജോ ജോസ് പെല്ലിശ്ശേരി എന്നും, ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആയിരിക്കും ഈ ചിത്രം നിർമ്മിക്കുക എന്നുമാണ് സൂചന. ചിത്രത്തിന്റെ കഥാ രൂപീകരണം നടക്കുകയാണെന്നാണ് റിപ്പോർട്ടുകൾ പറയുന്നത്.

മോഹൻലാൽ, ലിജോ എന്നിവർ തങ്ങളുടെ ഇപ്പോഴത്തെ മറ്റു കമ്മിറ്റ്മെന്റുകൾ പൂർത്തിയാക്കിക്കഴിഞ്ഞാൽ, ഈ ചിത്രത്തിന്റെ ജോലികളിലേക്ക് കടന്നേക്കാമെന്നും വിവരങ്ങളുണ്ട്. ഏതായാലും ഈ വാർത്തയെ കുറിച്ചുള്ള ഔദ്യോഗിക സ്ഥിരീകരണങ്ങൾ ഒന്നും തന്നെ ലഭ്യമല്ല. പക്ഷെ ലിജോ ജോസ് പെല്ലിശ്ശേരി എന്ന പ്രതിഭയും മോഹൻലാൽ എന്ന പ്രതിഭാസവും ഒരിക്കൽ കൂടി ഒന്നിച്ചു കാണാൻ ആഗ്രഹിക്കുന്ന പ്രേക്ഷകരും ആരാധകരും ആവേശത്തിലാണ്.