ഇനി ഇത്തിക്കര പക്കിയുടെ നാളുകൾ; കൊച്ചുണ്ണിയിൽ അഭിനയിക്കാൻ മോഹൻലാൽ എത്തി!

നിവിൻ പോളിയെ നായകനാക്കി റോഷൻ ആൻഡ്രൂസ് ഒരുക്കുന്ന ബിഗ് ബജറ്റ് ചിത്രമായ കായംകുളം കൊച്ചുണ്ണിയിൽ അതിഥി വേഷത്തിൽ മോഹൻലാലും എത്തുമെന്ന് നമ്മൾ എല്ലാവരും അറിഞ്ഞ കാര്യമാണ്. ഇത്തിക്കര പക്കി ആയാവും മോഹൻലാൽ ഈ ചിത്രത്തിൽ അഭിനയിക്കുന്നത് എന്ന് സംവിധായകൻ റോഷൻ ആൻഡ്രൂസ് തന്നെ പറഞ്ഞിരുന്നു. ഇപ്പോഴിതാ, ഈ ചിത്രത്തിന്റെ മംഗലാപുരം ലൊക്കേഷനിൽ മോഹൻലാൽ ജോയിൻ ചെയ്തു കഴിഞ്ഞു. ഏകദേശം ഇരുപതു ദിവസത്തെ ഡേറ്റ് ആണ് മോഹൻലാൽ ഈ ചിത്രത്തിന് നൽകിയിരിക്കുന്നത് എന്നാണ് സൂചന. ചിത്രത്തിൽ ഇരുപത്തഞ്ചു മിനിറ്റോളം മോഹൻലാൽ ഇത്തിക്കര പക്കി ആയി ഉണ്ടാകും. ഇത്തിക്കര പക്കി ആയുള്ള മോഹൻലാലിൻറെ ഗെറ്റപ്പ് കാണാനുള്ള ആവേശത്തിലാണ് ഇപ്പോൾ ആരാധകരും സിനിമ പ്രേമികളും.

കായംകുളം കൊച്ചുണ്ണിയുടെ ലൊക്കേഷനിൽ മോഹൻലാൽ എത്തിയപ്പോൾ ഉള്ള ഫോട്ടോകൾ ഇപ്പോൾ സോഷ്യൽ മീഡിയയിൽ വൈറൽ ആയിട്ടുണ്ട്. ബോബി- സഞ്ജയ് ടീം തിരക്കഥ ഒരുക്കിയ ഈ ചിത്രം നിർമ്മിക്കുന്നത് ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ ആണ്. പ്രിയ ആനന്ദ് നായികാ വേഷത്തിൽ എത്തുന്ന ഈ ചിത്രത്തിൽ സണ്ണി വെയ്ൻ, ബാബു ആന്റണി എന്നിവരും അഭിനയിക്കുണ്ട്. ബോളിവുഡ് ക്യാമറാമാൻ ബിനോദ് പ്രധാൻ ആണ് ഈ ചിത്രത്തിനായി ക്യാമറ ചലിപ്പിക്കുന്നത്.

അജോയ് വർമ്മ ഒരുക്കുന്ന നീരാളിയുടെ ആദ്യ ഷെഡ്യൂൾ തീർത്തതിന് ശേഷം ആണ് മോഹൻലാൽ കായംകുളം കൊച്ചുണ്ണിയിൽ ജോയിൻ ചെയ്തത്. മാർച്ചിൽ മോഹൻലാൽ ഒടിയൻ എന്ന ചിത്രത്തിന്റെ അവസാന ഷെഡ്യൂളിൽ ജോയിൻ ചെയ്യും. തുടർന്ന് ഭദ്രൻ സംവിധാനം ചെയ്യുന്ന ചിത്രത്തിൽ നായകൻ ആവുന്ന മോഹൻലാൽ ജൂണിൽ രഞ്ജിത് ഒരുക്കുന്ന ഒരു ബിലാത്തി കഥ എന്ന ചിത്രത്തിൽ അതിഥി വേഷം ചെയ്യും. അതിനു ശേഷം ആയിരിക്കും മലയാള സിനിമയൊന്നടങ്കം കാത്തിരിക്കുന്ന ചിത്രമായ ലുസിഫെറിൽ മോഹൻലാൽ ജോയിൻ ചെയ്യുന്നത്.