ഈ കണ്ണട വച്ചാൽ ഡ്രസ്സുകൾ ഒന്നും കാണില്ല; ഗേളിയുടേയും ശ്രീകുമാറിന്റെയും രസകരമായ ഓർമ്മകളുണർത്തി നീരാളി ടീസർ.

മലയാളികളുടെ പഴയകാല സിനിമ ഓർമ്മകളെ ഉണർത്തുന്ന കാഴ്ചകളുമാണ് നീരാളിയെത്തിയത്. അജോയ് വർമ്മ മോഹൻലാലിനെ നായകനാക്കി സംവിധാനം ചെയ്യുന്ന ആദ്യ മലയാള ചിത്രം നീരാളി ആരാധകർ ഈ വർഷം ഏറ്റവുമധികം പ്രതീക്ഷകളോടെ കാത്തിരിക്കുന്ന ചിത്രങ്ങളിലൊന്നാണ്. ചിത്രത്തിൽ മോഹൻലാലിൻറെ നായികയായി എത്തിയിരിക്കുന്നത് മലയാളികളുടെ പ്രിയ താരം നദിയാ മൊയ്‌തുവാണ്. ഒരു കാലത്ത് മലയാളസിനിമയിലെ ഏറ്റവും ആരാധകരുള്ള താരങ്ങളിലൊരാളായ നദിയാ മൊയ്തു, നോക്കെത്താ ദൂരത്ത് കണ്ണുംനട്ട് എന്ന ഫാസിൽ ചിത്രത്തിലൂടെയായിരുന്നു അരങ്ങേറിയത്. ഫാസിൽ സംവിധാനം ചെയ്ത ചിത്രം മലയാളത്തിലെ എക്കാലത്തേയും മികച്ച ചിത്രങ്ങളിൽ ഒന്നായാണ് കരുതപ്പെടുന്നത്. ചിത്രത്തിലെ നായകനായ ശ്രീകുമാറായി എത്തിയത് മോഹൻലാലായിരുന്നു ഇരുവരുടേയും കോമ്പിനേഷൻ രംഗങ്ങൾ എവർഗ്രീനായാണ് മലയാള സിനിമയുടെ ചരിത്രത്തിൽ നിലനിൽക്കുന്നത്. വർഷങ്ങളുടെ ഇടവേളയ്ക്ക് ശേഷം ഇരുവരും വീണ്ടും ഒന്നിക്കുമ്പോൾ പഴയ ഊർജത്തോടെ വീണ്ടും കാണാനാകുമോ എന്ന സംശയത്തിലായിരുന്നു ആരാധകർ.

എന്തുതന്നെയായാലും ആരാധകരുടെ പ്രതീക്ഷ വിഫലമായില്ല എന്ന് വേണം പറയാൻ. നോക്കെത്താദൂരത്ത് കണ്ണുംനട്ട് എന്ന ചിത്രത്തിലെ ‘ ആയിരം കണ്ണുമായി കാത്തിരുന്ന് നിന്നെ ഞാൻ ‘ എന്ന ഗാനവും ഇന്ന് പുറത്തിറങ്ങിയ ടീസറിൽ ഉണ്ടായിരുന്നു. ചിത്രത്തിലെ ഏറ്റവും രസകരമായ കൂളിംഗ് ഗ്ലാസ് രംഗവും ഒരിക്കൽക്കൂടി ടീസറിലൂടെ പ്രേക്ഷകർക്ക് കാണാനായി. വർഷങ്ങൾക്കു മുൻപ് ഇരുവരും ഒന്നിച്ചപ്പോൾ ലഭിച്ചത് ഒരു എവർഗ്രീൻ ഹിറ്റായിരുന്നു ഇത്തവണയും ആ വിജയം ആവർത്തിക്കും എന്ന് തന്നെയാണ് ടീസർ നൽകുന്ന പ്രതീക്ഷ. ചിത്രം ഈദ് റിലീസായി ജൂൺ 14ന് തിയറ്ററുകളിലെത്തും.