നസീർ- ഷീല ജോഡിയുടെ ഗാനത്തിന് നൃത്തം വെച്ച് മോഹൻലാലും മേനകയും; വീഡിയോ കാണാം

1968 ഇൽ റിലീസ് ചെയ്ത മലയാള ചിത്രമാണ് പ്രേം നസീർ- ഷീല ജോഡി അഭിനയിച്ച ഭാര്യമാർ സൂക്ഷിക്കുക. ഈ ചിത്രത്തിലെ ഒരു സൂപ്പർ ഹിറ്റ് ഗാനം ആയിരുന്നു ചന്ദ്രികയിലലിയുന്നു ചന്ദ്രകാന്തം എന്ന ശ്രീകുമാരൻ തമ്പി രചിച്ച ഗാനം. വി ദക്ഷിണാമൂർത്തി സ്വാമി സംഗീതം പകർന്ന ഈ ഗാനം ആലപിച്ചത് കെ ജെ യേശുദാസും പി ലീലയും ചേർന്നാണ്. ഇപ്പോഴിതാ ആ എവർ ഗ്രീൻ ഗാനത്തിന് ചുവടു വെക്കുന്ന കംപ്ലീറ്റ് ആക്ടർ മോഹൻലാലിന്റേയും നടി മേനകയുടേയും വീഡിയോ സോഷ്യൽ മീഡിയയുടെ ശ്രദ്ധ നേടുകയാണ്. കഴിഞ്ഞ ദിവസം നടന്ന എൺപതുകളിൽ സിനിമയിൽ വന്ന താരങ്ങളുടെ റീയൂണിയനു മുൻപ്, ആ പരിപാടിയിൽ പെർഫോം ചെയ്യാനായി മോഹൻലാൽ- മേനക ജോഡി ഈ ഗാനത്തിന്റെ പശ്ചാത്തലത്തിൽ നൃത്ത ചുവടുകൾ വെക്കുന്ന വീഡിയോ പോസ്റ്റ് ചെയ്തത് നടി സുഹാസിനി മണി രത്‌നം ആണ്. നടി ലിസ്സി ആണ് ഈ ഗാനം പെർഫോം ചെയ്യാൻ നിർദേശിച്ചത് എന്നും ബ്രിന്ദ മാസ്റ്റർ ആണ് ഇതിനു വേണ്ടി നൃത്ത ചുവടുകൾ ഒരുക്കിയത് എന്നും സുഹാസിനി പറയുന്നു. ഈ താര കൂട്ടായ്മ സംഘടിപ്പിക്കാൻ പറ്റിയതിൽ തനിന്നു ഒരുപാട് അഭിമാനിക്കുന്നു എന്നും സുഹാസിനി പറഞ്ഞു.

ചിരഞ്ജീവിയുടെ ഹൈദരാബാദിൽ ഉള്ള പുതിയ വീട്ടിൽ വെച്ചാണ് ഈ വർഷം താരങ്ങൾ ഒത്തു കൂടിയത്. മോഹൻലാൽ, മേനക, ജയറാം, റഹ്മാൻ, ശോഭന, പാർവതി, സുമലത, ചിരഞ്ജീവി, ജാക്കി ഷെറോഫ്, ഭാഗ്യ രാജ്, വെങ്കിടേഷ്, നാഗാർജുന, ജഗപതി ബാബു, ശരത് കുമാർ, രാധിക ശരത് കുമാർ തുടങ്ങി ഒട്ടേറെ അഭിനേതാക്കൾ ഈ പരിപാടിയിൽ പങ്കെടുത്തു. ഇത്തരത്തിലൊരു റീയൂണിയൻ ലിസ്സി, സുഹാസിനി എന്നിവർ ആരംഭിച്ചിട്ട് പത്താമത്തെ വർഷം ആണ് ഇത്. എല്ലാ വർഷത്തേയും പോലെ പാട്ടും നൃത്തവുമെല്ലാമായി മോഹൻലാൽ തന്നെയാണ് ഇത്തവണയും താര കൂട്ടായ്മയിലെ താരം ആയി മാറിയത്.