എന്റെ ഉമ്മാന്റെ പേര് കണ്ടു മമ്മുക്ക; ടോവിനോക്കു മെഗാ സ്റ്റാറിന്റെ അഭിനന്ദനം..!

യുവ താരം ടോവിനോ തോമസിന്റെ പുതിയ റിലീസ് ആണ് നവാഗതനായ ജോസ് സെബാസ്റ്റിയൻ രചനയും സംവിധാനവും നിർവഹിച്ച എന്റെ ഉമ്മാന്റെ പേര്. ശരത് ആർ നാഥും ആയി ചേർന്ന് സംവിധായകൻ തന്നെ തിരക്കഥയും സംഭാഷണവും എഴുതിയ ഈ ചിത്രത്തിൽ ടോവിനോ തോമസ്, ഉർവശി എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ആന്റോ ജോസെഫ് ഫിലിം കമ്പനി, അൽ ടാരി ഫിലിംസ് എന്നിവയുടെ ബാനറിൽ ആന്റോ ജോസഫും  സി ആർ സലീമും  ചേർന്ന് നിർമ്മിച്ചിരിക്കുന്ന  ഈ ഫാമിലി ഡ്രാമക്കു മികച്ച പ്രേക്ഷക പ്രതികരണവും നിരൂപക പ്രശംസയുമാണ് ലഭിക്കുന്നത്. ഇപ്പോഴിതാ ഈ ചിത്രം കണ്ടു മലയാളത്തിന്റെ മഹാനടൻ മമ്മൂട്ടിയും അണിയറ പ്രവർത്തകരെ അഭിനന്ദിച്ചു എന്ന റിപ്പോർട്ടുകൾ ആണ് പുറത്തു വരുന്നത്.

മമ്മൂട്ടിയെ ഈ ചിത്രം കാണിക്കുകയും ചിത്രം കണ്ടിഷ്ട്ടപെട്ട അദ്ദേഹം ടോവിനോ തോമസിനെ അഭിനന്ദിക്കുകയും ചെയ്തു. മമ്മൂട്ടി ആരാധകൻ കൂടിയായ ടോവിനോക്കു ഇരട്ടി സന്തോഷമാണ് ഈ ചിത്രം സമ്മാനിച്ചിരിക്കുന്നതു. ഗംഭീര പ്രകടനവുമായി പ്രശസ്ത നടി ഉർവശി ആണ് ഈ ചിത്രത്തിൽ ഏറ്റവും കൂടുതൽ കയ്യടി നേടിയിരിക്കുന്നതെന്നു പ്രേക്ഷക പ്രതികരണങ്ങൾ സൂചിപ്പിക്കുന്നു. ഒരമ്മയുടെയും മകന്റെയും ആത്മബന്ധത്തിന്റെ വളരെ മനോഹരമായ ഒരു കഥയാണ് ഈ ചിത്രത്തിൽ ഏറെ രസകരമായി പറയുന്നത്. മലബാറി മുസ്ലിം ആയ ഹമീദ് എന്ന ചെറുപ്പക്കാരനാണ് ടോവിനോ തോമസ് അവതരിപ്പിക്കുന്ന കേന്ദ്ര കഥാപാത്രം.  ജോർഡി പ്ലാനെൽ ക്ലോസെ ദൃശ്യങ്ങൾ  ഒരുക്കിയ ഈ ചിത്രത്തിന് സംഗീതം ഒരുക്കിയത് ഗോപി സുന്ദർ ആണ്. അർജു ബെൻ ആണ് ഈ ചിത്രത്തിന്റെ എഡിറ്റിംഗ് നിർവഹിച്ചിരിക്കുന്നത്. ഹാരിഷ് കണാരൻ, മാമുക്കോയ, സിദ്ദിഖ്, ശാന്തി കൃഷ്ണ, ദിലീഷ് പോത്തൻ  എന്നിവരും ഈ ചിത്രത്തിൽ അഭിനയിച്ചിട്ടുണ്ട്.