മോഹൻലാലും മമ്മൂട്ടിയുമല്ല; മലയാളത്തിലെ തന്റെ പ്രിയപ്പെട്ട നടൻ ആരെന്നു വെളിപ്പെടുത്തി മീന..

തെന്നിന്ത്യൻ സിനിമയിലെ സൂപ്പർ താരങ്ങളുടെയെല്ലാം നായികാ വേഷം ചെയ്തു ഒരുകാലത്തു തെന്നിന്ത്യയിലെ സൂപ്പർ നായികയായി തിളങ്ങിയ താരമാണ് മീന. ഇപ്പോഴും അഭിനയ രംഗത്ത് സജീവമായ മീന മലയാളം, തമിഴ്, തെലുങ്ക് ചിത്രങ്ങളിൽ ഒക്കെ കയ്യടി നേടിയെടുത്ത താരമാണ്. മലയാളത്തിൽ മോഹൻലാലിനൊപ്പം വര്ണപ്പകിട്ടു, മിസ്റ്റർ ബ്രഹ്മചാരി, നാട്ടുരാജാവ്, ഉദയനാണു താരം, ദൃശ്യം, മുന്തിരി വള്ളികൾ തളിർക്കുമ്പോൾ , ദൃശ്യം 2 എന്നീ ഹിറ്റ് ചിത്രങ്ങൾ സമ്മാനിച്ച മീന മോഹൻലാലിന്റെ ഭാഗ്യ നായികമാരിൽ ഒരാൾ കൂടിയായാണ് അറിയപ്പെടുന്നത്. രജനികാന്തിന്റെ കൂടെ അഭിനയിച്ച അണ്ണാത്തെ എന്ന ചിത്രവും മോഹൻലാലിനെ നായകനാക്കി പൃഥ്വിരാജ് സുകുമാരൻ ഒരുക്കുന്ന ബ്രോ ഡാഡി എന്ന ചിത്രവുമാണ് ഇനി മീനയുടേതായി വരാനുള്ള ചിത്രങ്ങൾ. ദൃശ്യം 2 ന്റെ തെലുങ്കു റീമേക്കിലും മീന തന്നെയാണ് നായികാ വേഷം ചെയ്യുന്നത്. ഇപ്പോഴിതാ തനിക്കു ഏറ്റവും പ്രീയപ്പെട്ട മലയാള നടൻ ആരാണെന്നു വെളിപ്പെടുത്തുകയാണ് ഈ നടി.

ഇൻസ്റ്റഗ്രാം ക്യു. എ സെക്ഷനിലാണ് ഇക്കാര്യം മീന വെളിപ്പെടുത്തിയത്. നെടുമുടി വേണുവാണ് മലയാളത്തിലെ തന്റെ പ്രീയപ്പെട്ട നടൻ എന്നാണ് മീന പറയുന്നത്. തമിഴിലെ പ്രീയപ്പെട്ട നടൻ ശിവാജി ഗണേശൻ ആണെന്ന് പറഞ്ഞ മീനയ്ക്ക് നാഗേശ്വര റാവുവിനോടും ആരാധന ഉണ്ട്. ശിവാജി ഗണേശന്റെ നെഞ്ചങ്ങൾ എന്ന തമിഴ് സിനിമയിൽ ബാലനടിയായിട്ടായിരുന്നു മീനയുടെ അരങ്ങേറ്റം. മോഹൻലാലിനെയാണോ മമ്മൂട്ടിയെയാണോ കൂടുതൽ ഇഷ്ടമെന്ന് ഒരു ആരാധകൻ ചോദിച്ചപ്പോൾ രണ്ട് പേരേയും ഒരുപോലെ ഇഷ്ടമാണെന്ന രീതിയിൽ ”ലാലൂട്ടി” എന്ന മറുപടി ആണ് മീന പറഞ്ഞത്. ജീത്തു ജോസഫ്, സിദ്ദിഖ് എന്നിവരാണ് മലയാളത്തിലെ പ്രിയപ്പെട്ട സംവിധായകർ എന്നും മീന പറഞ്ഞു. മമ്മൂട്ടി, ജയറാം, സുരേഷ് ഗോപി, രജനികാന്ത്, കമൽ ഹാസൻ, ചിരഞ്ജീവി, വിജയ്, അജിത്, സൂര്യ എന്നിവർക്കൊപ്പമെല്ലാം അഭിനയിച്ചിട്ടുള്ള നടിയാണ് മീന.