കേരളത്തിലെ തൊണ്ണൂറു ശതമാനം തീയേറ്ററിലും മരക്കാർ എത്തും; മലയാള സിനിമ കാണാൻ പോകുന്നത് ചരിത്രത്തിലെ ഏറ്റവും വലിയ റിലീസ്..!

കംപ്ലീറ്റ് ആക്ടർ മോഹൻലാലിനെ നായകനാക്കി പ്രിയദർശൻ ഒരുക്കിയ ബ്രഹ്മാണ്ഡ ചിത്രമാണ് മരക്കാർ അറബിക്കടലിന്റെ സിംഹം. മോഹൻലാലിന്റേയും പ്രിയദർശന്റെയും കരിയറിലെ മാത്രമല്ല, മലയാള സിനിമയുടെ ചരിത്രത്തിലെ തന്നെ ഏറ്റവും വലിയ ചിത്രമാണ് ഇത്. അടുത്ത വർഷം മാർച്ച് പത്തൊന്പതിനു റിലീസ് ചെയ്യാൻ പോകുന്ന ഈ ചിത്രം നൂറു കോടി രൂപയ്ക്കു മുകളിൽ ചെലവിട്ടാണ് ഒരുക്കിയിരിക്കുന്നത്. മലയാള സിനിമയുടെ ചരിത്രത്തിലെ ഏറ്റവും വലിയ റിലീസ് ആവും മരക്കാർ നേടുക. ഇതിനോടകം അഞ്ഞൂറോളം സ്ക്രീനുകൾ കേരളത്തിൽ മരക്കാർ പ്രദർശിപ്പിക്കാൻ ഒരുങ്ങി കഴിഞ്ഞു. കേരളത്തിൽ തൊണ്ണൂറു ശതമാനം സ്‌ക്രീനുകളിലും മരക്കാർ റിലീസിന് എത്തും എന്നാണ് ഇപ്പോൾ വരുന്ന റിപ്പോർട്ടുകൾ സൂചിപ്പിക്കുന്നത്.

മലയാള സിനിമയുടെ ചരിത്രത്തിലെ ഏറ്റവും വലിയ ഓവർസീസ് റൈറ്റ്സ് സ്വന്തമാക്കിയ മരക്കാർ, മലയാള സിനിമയുടെ ചരിത്രത്തിലെ ഏറ്റവും വലിയ മ്യൂസിക് റൈറ്റ്‌സും സ്വന്തമാക്കി. പ്രിയദർശനും ഐ വി ശശിയുടെ മകനായ അനി ഐ വി ശശിയും ചേർന്നാണ് ഈ ചിത്രം രചിച്ചിരിക്കുന്നത്. അൻപതിൽ അധികം രാജ്യങ്ങളിൽ റിലീസ് ചെയ്യുന്ന ആദ്യ മലയാള ചിത്രം എന്ന റെക്കോർഡും മരക്കാർ നേടും. ഏതായാലും അഞ്ചു ഭാഷകളിൽ ആയി ഇന്ത്യൻ സിനിമയിലെ തന്നെ ഏറ്റവും വലിയ റിലീസുകളിൽ ഒന്നാവാൻ ഒരുങ്ങുകയാണ് ഈ മോഹൻലാൽ ചിത്രം.

ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ, കോൺഫിഡന്റ് ഗ്രൂപ്പിന്റെ ബാനറിൽ ഡോക്ടർ സി ജെ റോയ്, മൂൺ ഷോട്ട് എന്റെർറ്റൈന്മെന്റിന്റെ ബാനറിൽ സന്തോഷ് ടി കുരുവിള എന്നിവർ ചേർന്ന് നിർമ്മിക്കുന്ന ഈ ചിത്രം മലയാളം, തമിഴ്, തെലുങ്കു, ഹിന്ദി, കന്നഡ ഭാഷകളിൽ ആണ് എത്തുക. അതിനു ശേഷം അറബി, ചൈനീസ് ഭാഷകളിലും ഈ ചിത്രം റിലീസിന് എത്തും. മോഹൻലാലിന് ഒപ്പം മഞ്ജു വാര്യർ, പ്രഭു, അർജുൻ സർജ, സുനിൽ ഷെട്ടി, പ്രണവ് മോഹൻലാൽ, സിദ്ദിഖ്, കീർത്തി സുരേഷ്, കല്യാണി പ്രിയദർശൻ, മുകേഷ്, നെടുമുടി വേണു, ബാബുരാജ്, അശോക് സെൽവൻ, ബാബുരാജ്, മാമുക്കോയ തുടങ്ങി ഒരു വലിയ താരനിരയാണ് ഈ ചിത്രത്തിൽ അഭിനയിക്കുന്നത്.