വമ്പൻ താര നിരയുമായി മണി രത്‌നം വീണ്ടും എത്തുന്നു; ഇത്തവണ വിക്രം- വിജയ് സേതുപതി- ദുൽഖർ സൽമാൻ ടീം..

ചെക്ക ചിവന്ത വാനം എന്ന സൂപ്പർ ഹിറ്റ് ചിത്രത്തിലൂടെ വലിയ തിരിച്ചു വരവാണ് മണി രത്‌നം എന്ന മാസ്റ്റർ ഡയറക്ടർ കഴിഞ്ഞ വർഷം കാഴ്ച വെച്ചത്. അതിനു ശേഷം അദ്ദേഹത്തിന്റെ പുതിയ പ്രൊജെക്ടുകളെ പറ്റി ഒട്ടേറെ ഊഹാപോഹങ്ങൾ പുറത്തു വന്നിരുന്നു. ഇപ്പോഴും ആ വാർത്തകൾക്കു ശമനമില്ല. പുതിയതായി വന്നിരിക്കുന്ന ചില റിപ്പോർട്ടുകൾ പറയുന്നത് തന്റെ ഡ്രീം പ്രൊജക്റ്റ് ആയ പൊന്നിയിൽ സെൽവൻ പൊടി തട്ടിയെടുക്കാൻ പോവുകയാണ് അദ്ദേഹം എന്നാണ്. ലൈക്ക പ്രൊഡക്ഷൻസ് നിർമ്മിക്കുന്ന ഈ ബിഗ് ബജറ്റ് ചിത്രം കൽക്കി കൃഷ്ണമൂർത്തി രചിച്ച അഞ്ചു ഭാഗങ്ങൾ ഉള്ള നോവലിന്റെ ചലച്ചിത്രാവിഷ്കാരം ആയിരിക്കും. വർഷങ്ങൾക്കു മുൻപ് മണി രത്‌നം ഇത് പ്ലാൻ ചെയ്തിരുന്നു എങ്കിലും ആ പ്രൊജക്റ്റ് നടക്കാതെ പോയി.

ഇപ്പോൾ കേൾക്കുന്ന റിപ്പോർട്ടുകൾ നമ്മളോട് പറയുന്നത് വമ്പൻ താര നിരയെ തന്നെയാണ് അദ്ദേഹം ഈ ചിത്രത്തിൽ അണിനിരത്താൻ പോകുന്നത് എന്നാണ്. ചിയാൻ വിക്രം, മക്കൾ സെൽവൻ വിജയ് സേതുപതി, ബോളിവുഡ് സൂപ്പർ നായിക ഐശ്വര്യ റായ് ബച്ചൻ, തമിഴ് യുവ താരം ജയം രവി, മലയാളം യുവ താരം ദുൽഖർ സൽമാൻ എന്നിവരാണ് ആ താരങ്ങൾ എന്നാണ് വരുന്ന റിപ്പോർട്ടുകൾ സൂചിപ്പിക്കുന്നത്. ദളപതി വിജയ് ഈ ചിത്രത്തിൽ നായകനാവും എന്നൊരു റിപ്പോർട്ടും നേരത്തെ പുറത്തു വന്നിരുന്നു. ഏതായാലും ഇതുവരെ ഒഫീഷ്യൽ ആയുള്ള ഒരു വാർത്തകളും മണി രത്‌നമോ അദ്ദേഹത്തോട് അടുത്ത വൃത്തങ്ങളോ പുറത്തു വിട്ടിട്ടില്ല. ഈ വാർത്ത സത്യമായാൽ സൗത്ത് ഇന്ത്യൻ സിനിമയിലെ തന്നെ ഒരു ഇതിഹാസ ചിത്രം ആയിരിക്കും പിറവിയെടുക്കുക എന്നുറപ്പാണ്.