പുതിയ വർഷത്തിലെ മെഗാ സ്റ്റാറിന്റെ ആദ്യ മെഗാ ഹിറ്റ് ആയി ഷൈലോക്ക്

പുതിയ വർഷം മെഗാ സ്റ്റാർ മമ്മൂട്ടിക്ക് ഭാഗ്യം കൊണ്ട് വരും എന്ന സൂചനയുമായി ഈ വർഷത്തെ മമ്മൂട്ടിയുടെ ആദ്യ റിലീസ് ആയ ഷൈലോക്ക് മികച്ച വിജയത്തിലേക്കാണ് നീങ്ങുന്നത്. ഇന്നലെ റിലീസ് ചെയ്ത ഷൈലോക്ക് ആരാധകർക്ക് ആവേശം നൽകുന്ന ഒരു ചിത്രമാണെന്ന റിപ്പോർട്ടുകളാണ് പുറത്തു വരുന്നത്. ആരാധകരെ തൃപ്തിപ്പെടുത്തുന്ന ഈ ചിത്രം മാസ്സ് എന്റർടൈനറായാണ് ഒരുക്കിയിരിക്കുന്നത്. രാജാധിരാജ എന്ന മമ്മൂട്ടി ചിത്രമൊരുക്കി അരങ്ങേറ്റം കുറിച്ച അജയ് വാസുദേവ് ഒരുക്കിയ മൂന്നാമത്തെ ചിത്രമാണ് ഷൈലോക്ക്. മമ്മൂട്ടി നായകനായ മാസ്റ്റർപീസ് ആയിരുന്നു ഈ സംവിധായകന്റെ രണ്ടാം ചിത്രം. ഗുഡ് വിൽ എന്റെർറ്റൈന്മെന്റിന്റെ ബാനറിൽ ജോബി ജോർജാണ് ഈ ചിത്രം നിർമ്മിച്ചിരിക്കുന്നത്.

കസബ, അബ്രഹാമിന്റെ സന്തതികൾ എന്നീ ചിത്രങ്ങൾക്ക് ശേഷം മമ്മൂട്ടിയെ നായകനാക്കി ജോബി ജോർജ് നിർമ്മിച്ച ചിത്രമാണിത്. വലിയ താരനിര തന്നെ അണിനിരക്കുന്ന ഈ ചിത്രത്തിൽ മമ്മൂട്ടിക്കൊപ്പം കേന്ദ്ര കഥാപാത്രമായി എത്തുന്നത് തമിഴ് നടൻ രാജ് കിരൺ ആണ്. സിദ്ദിഖ്, കലാഭവൻ ഷാജോൺ, റാഫി തുടങ്ങിയവർ വില്ലന്മാരായി എത്തുമ്പോൾ നായികാ വേഷം ചെയ്തത് മീനയാണ്. ഇവരെ കൂടാതെ ബൈജു സന്തോഷ്, ഹരീഷ് കണാരൻ, ബിബിൻ ജോർജ്, അർജുൻ നന്ദകുമാർ, പ്രശാന്ത് അലക്സാണ്ടർ, ജോൺ വിജയ്, ഹരീഷ് പേരാടി എന്നിവരും ഈ ചിത്രത്തിൽ അഭിനയിച്ചിരിക്കുന്നു. നവാഗതരായ ബിബിൻ മോഹൻ, അനീഷ് ഹമീദ് എന്നിവർ ചേർന്ന് തിരക്കഥ രചിച്ച ഈ ചിത്രത്തിന് ഛായാഗ്രഹണം നിർവഹിച്ചത് റെനഡിവേയും സംഗീതമൊരുക്കിയത് ഗോപി സുന്ദറുമാണ്. ഒരു വലിയ വിജയം തന്നെ ഈ ചിത്രം നേടുമെന്ന പ്രതീക്ഷയിലാണ് മമ്മൂട്ടി ആരാധകർ.