മെഗാസ്റ്റാറിന്റെ നൻ പകൽ നേരത്ത് മയക്കം ഇന്ന് മുതൽ; തീയേറ്റർ ലിസ്റ്റ് എത്തി

മെഗാസ്റ്റാർ മമ്മൂട്ടി നായകനായി എത്തുന്ന ഏറ്റവും പുതിയ ചിത്രമായ നൻ പകൽ നേരത്ത് മയക്കം ഇന്ന് മുതൽ പ്രദർശനം ആരംഭിക്കുന്നു. കേരളത്തിൽ നൂറിൽ അധികം സ്‌ക്രീനുകളിൽ ആണ് ഈ ചിത്രം റിലീസ് ചെയ്തിരിക്കുന്നത്. ഇതിന്റെ തീയേറ്റർ ലിസ്റ്റ് ഇവിടെ ചേർക്കുന്നു. മമ്മൂട്ടി കമ്പനിയുടെ ബാനറിൽ അദ്ദേഹം തന്നെ നിർമ്മിച്ച ഈ ചിത്രം കേരളത്തിൽ വിതരണം ചെയ്തിരിക്കുന്നത് ദുൽഖർ സൽമാന്റെ വേ ഫെറർ ഫിലിംസ് ആണ്. മമ്മൂട്ടി കമ്പനി നിർമ്മിച്ച ആദ്യത്തെ ചിത്രമാണ് നൻ പകൽ നേരത്ത് മയക്കം. മാസ്റ്റർ ഡയറക്ടർ ലിജോ ജോസ് പെല്ലിശേരി മമ്മൂട്ടിയെ നായകനാക്കി ആദ്യമായി ഒരുക്കിയ ചിത്രമെന്ന പ്രത്യേകതയും ഇതിനുണ്ട്. കഴിഞ്ഞ മാസം നടന്ന കേരളാ അന്താരാഷ്ട്ര ചലചിത്രോത്സവത്തിൽ പ്രീമിയർ ചെയ്ത ഈ ചിത്രത്തിന് പ്രേക്ഷകരും നിരൂപകരും മികച്ച പ്രശംസയാണ് നൽകിയത്. അത്കൊണ്ട് തന്നെ സിനിമാ പ്രേമികൾ ഏറെ കാത്തിരുന്ന ഒരു റിലീസ് കൂടിയാണ് ഈ ചിത്രം.

രമ്യാ പാണ്ട്യൻ, അശോകൻ, കൈനകരി തങ്കരാജ്, സുരേഷ് ബാബു, ചേതൻ ജയലാൽ, അശ്വന്ത് അശോക് കുമാർ, രാജേഷ് ശർമ്മ എന്നിവരും വേഷമിട്ട ഈ ചിത്രത്തിന് തിരക്കഥ രചിച്ചത് എസ് ഹരീഷ് ആണ്. മലയാളത്തിനൊപ്പം തമിഴിലും ഒരുക്കിയ ഈ ചിത്രത്തിന്റെ തമിഴ് പതിപ്പ് അടുത്തയാഴ്ച റിലീസ് ചെയ്യുമെന്നാണ് സൂചന. പൂർണ്ണമായും പഴനിയിൽ ചിത്രീകരിച്ച ഈ ചിത്രത്തിന് ക്യാമറ ചലിപ്പിച്ചത് തേനി ഈശ്വറും എഡിറ്റ് ചെയ്തിരിക്കുന്നത് ദീപു ജോസഫുമാണ്. ജെയിംസ്, സുന്ദരം എന്നീ രണ്ട് വ്യത്യസ്ത കഥാപാത്രങ്ങൾക്കാണ് മമ്മൂട്ടി ഈ ചിത്രത്തിൽ ജീവൻ പകർന്നിരിക്കുന്നത്.