മമ്മൂട്ടിയുടെ കുഞ്ഞാലി മരക്കാർ പ്രഖ്യാപനം ഉടൻ; സംവിധാനം ചെയ്യുന്നത് രഞ്ജിത് അല്ലെങ്കിൽ രതീഷ് അമ്പാട്ട്..?

മാസ്റ്റർ ഡയറക്ടർ പ്രിയദർശൻ, മലയാളത്തിന്റെ താര ചക്രവർത്തിയായ മോഹൻലാലിനെ നായകനാക്കി ഒരുക്കുന്ന മരക്കാർ: അറബിക്കടലിന്റെ സിംഹം എന്ന ചിത്രത്തിന്റെ ഷൂട്ടിംഗ് ഇപ്പോൾ ഹൈദരാബാദിൽ പുരോഗമിക്കുകയാണ്. ഡിസംബർ ഒന്നിന് ഷൂട്ടിംഗ് തുടങ്ങിയ ഈ ചിത്രം മാർച്ചിൽ അവസാനിക്കും. നൂറു കോടി രൂപക്കു മുകളിൽ  ബഡ്ജറ്റിൽ ആണ് ഈ ചിത്രം ഒരുക്കുന്നത്. എന്നാൽ ഈ ചിത്രത്തിന്റെ ഷൂട്ടിങ് അവസാനിക്കാൻ ഇരിക്കെ കുഞ്ഞാലി മരക്കാരുടെ കഥ പറയുന്ന മറ്റൊരു  ചിത്രം കൂടി മലയാളത്തിൽ പ്രഖ്യാപിക്കാൻ പോവുകയാണ് എന്ന സൂചനയാണ് ലഭിക്കുന്നത്. മെഗാ സ്റ്റാർ മമ്മൂട്ടി ആയിരിക്കും ഈ ചിത്രത്തിൽ നായകൻ.

ടി പി രാജീവൻ, ശങ്കർ രാമകൃഷ്ണൻ എന്നിവർ ചേർന്ന് രചന നിർവഹിച്ചിരിക്കുന്ന ഈ ചിത്രം നിർമ്മിക്കാൻ പോകുന്നത് ഓഗസ്റ്റ് സിനിമാസിന്റെ ബാനറിൽ ഷാജി നടേശൻ, ഗുഡ് വിൽ എന്റെർറ്റൈന്മെന്റിന്റെ ബാനറിൽ ജോബി ജോർജ് എന്നിവർ ചേർന്നാണ്. പ്രശസ്ത ക്യാമറാമാനും സംവിധായകനുമായ സന്തോഷ് ശിവൻ ഈ ചിത്രം സംവിധാനം ചെയ്യും എന്നാണ് ആദ്യം വാർത്തകൾ വന്നത് എങ്കിലും അദ്ദേഹം അതിൽ നിന്ന് പിന്മാറി എന്നാണ് എന്നാണ് ഇപ്പോൾ ലഭിക്കുന്ന വിവരങ്ങൾ സൂചിപ്പിക്കുന്നത്. അതിനു പകരം, പ്രശസ്ത സംവിധായകൻ രഞ്ജിത്, കമ്മാര സംഭവം എന്ന ദിലീപ് ചിത്രം ഒരുക്കികൊണ്ടു കഴിഞ്ഞ വര്ഷം അരങ്ങേറിയ രതീഷ് അമ്പാട്ട് എന്നിവരിൽ ഒരാൾ ആയിരിക്കും മമ്മൂട്ടിയുടെ കുഞ്ഞാലി മരക്കാർ ഒരുക്കുക എന്നതാണ് ഇപ്പോൾ പുറത്തു വരുന്ന സ്ഥിതീകരിക്കാത്ത വിവരങ്ങൾ പറയുന്നത്. എഴുപതു കോടി രൂപ ബഡ്ജറ്റിൽ ആവും ഈ ചിത്രം ഒരുക്കുക എന്നും സൂചനകൾ ലഭിക്കുന്നുണ്ട്.