ഹാട്രിക് വിജയത്തിനായി മെഗാ ടീം വീണ്ടും ഒന്നിക്കുന്നു

മെഗാ സ്റ്റാർ മമ്മൂട്ടിയോടൊപ്പം തന്റെ മൂന്നാമത്തെ ചിത്രമൊരുക്കാനുള്ള തയ്യാറെടുപ്പിലാണ് പ്രശസ്ത സംവിധായകൻ വൈശാഖ്. ന്യൂ യോർക് എന്നു പേരിട്ടിരിക്കുന്ന ഈ ചിത്രം പൂർണമായും അമേരിക്കയിൽ ചിത്രീകരിക്കുന്ന ഒരു ഫാമിലി ആക്ഷൻ ത്രില്ലറാണെന്നാണ് വൈശാഖ് അറിയിച്ചിരിക്കുന്നത്. യുണൈറ്റഡ് ഗ്ലോബൽ മീഡിയ നിർമ്മിക്കാൻ പോകുന്ന ഈ ചിത്രത്തിന്റെ തിരക്കഥ രചിച്ചിരിക്കുന്നത് ഇര എന്ന ഉണ്ണി മുകുന്ദൻ- ഗോകുൽ സുരേഷ് ചിത്രം രചിച്ച നവീൻ ജോണ് ആണ്. വൈശാഖ്- ഉദയ കൃഷ്ണ എന്നിവർ ചേർന്ന് നിർമ്മിച്ച ചിത്രമാണ് ഇര.

മമ്മൂട്ടിയുടെയൊപ്പം വൈശാഖ് ഒന്നിക്കുമ്പോൾ പ്രേക്ഷകർക്ക് പ്രതീക്ഷകളേറെയാണ്. വൈശാഖിന്റെ ആദ്യ ചിത്രമായ പോക്കിരി രാജയിൽ മമ്മൂട്ടിയായിരുന്നു നായകൻ. അതിനു ശേഷം ഈ ടീം ഒന്നിച്ചത് കഴിഞ്ഞ വർഷത്തെ സൂപ്പർ ഹിറ്റുകളിലൊന്നായ മധുര രാജയിലൂടെയാണ്. പോക്കിരി രാജയുടെ രണ്ടാം ഭാഗമായിരുന്നു മധുര രാജ.

മമ്മൂട്ടിയുടെയൊപ്പം ഹാട്രിക്ക് വിജയം ലക്ഷ്യമാക്കിയിരിക്കും വൈശാഖ് എത്തുക. ന്യൂ യോർക്കിൽ മമ്മൂട്ടിയോടൊപ്പം മലയാളത്തിലെയും ഹോളിവുഡിലേയും താരങ്ങൾ അണിനിരക്കുന്നുണ്ട്. ഈ ചിത്രത്തിന്റെ ആക്ഷൻ സംവിധായകനും ഹോളിവുഡിൽ നിന്നായിരിക്കും. ന്യൂ യോർക് ആയിരിക്കും മമ്മൂട്ടിയുടെ ഈ വർഷത്തെ ക്രിസ്മസ് റിലീസെന്നാണ് സൂചന.

മമ്മൂട്ടിയുടെ ഏറ്റുവും ഒടുവിലായി റിലീസ് ചെയ്‌ത ചിത്രമാണ് അജയ് വാസുദേവ് സംവിധാനം ചെയ്ത ഷൈലോക്ക്. ഈ വർഷത്തെ മെഗാസ്റ്റാറിന്റെ ആദ്യ ഹിറ്റ് സമ്മാനിച്ച ചിത്രം നിർമ്മിച്ചത് ഗുഡ്‌വിൽ എന്റർടൈന്റ്‌മെൻറ്സിന്റെ ബാനറിൽ ജോബി ജോർജാണ്. ചിത്രം തീയേറ്ററുകളിൽ മികച്ച പ്രതികരണങ്ങൾ നേടി മുന്നേറുന്നു.