നിഗൂഢതയൊളിപ്പിച്ച് സ്റ്റൈലിഷ് ലുക്കിൽ മെഗാസ്റ്റാർ മമ്മൂട്ടി വീണ്ടും; അങ്കിളിൻറെ പുതിയ പോസ്റ്റർ പുറത്തിറങ്ങി.

മെഗാസ്റ്റാർ മമ്മൂട്ടി നായകനായി റിലീസിനെത്തുന്ന ഈ വർഷത്തെ മൂന്നാമത്തെ ചിത്രം അങ്കിളിൻറെ പുതിയ പോസ്റ്റർ പുറത്തിറങ്ങി. അവാർഡുകളും നിരൂപക പ്രശംസയും വളരെയധികം നേടിയ ഷട്ടർ എന്ന ചിത്രത്തിനു ശേഷം ജോയ് മാത്യു തിരക്കഥ രചിച്ച ചിത്രമാണ് അങ്കിൾ. മമ്മൂട്ടി ഇതുവരെ ചെയ്തിട്ടില്ലാത്ത ഒരു വ്യത്യസ്ത കഥാപാത്രമായാണ് ചിത്രത്തിൽ എത്തുന്നത് എന്നാണ് അണിയറപ്രവർത്തകർ അറിയിച്ചിരുന്നത്. എന്നാൽ അതെല്ലാം ശരിവെക്കുന്ന രീതിയിലുള്ള പോസ്റ്ററുകളാണ് പുറത്തുവന്നുകൊണ്ടിരിക്കുന്നത്. ഒരു സിഗരറ്റ് കത്തിച്ചു പിടിച്ച് കണ്ണുകളിൽ നിഗൂഢതയുമായി എത്തിയ മമ്മൂട്ടിയെയാണ് പുതിയ പോസ്റ്ററിൽ കാണാനാകുന്നത്. കഴിഞ്ഞ ദിവസം പുറത്തുവന്ന ചിത്രത്തിന്റെ പോസ്റ്ററുകളും ടീസറുകളും എല്ലാം തന്നെ ആരാധക പ്രതീക്ഷ വളരെയധികം വർദ്ധിപ്പിച്ചിരിക്കുകയാണ്. ഒപ്പം ചിത്രത്തിന്റെ ടീസർ വളരെയധികം ശ്രദ്ധനേടുകയുണ്ടായി.

നവാഗതനായ ഗിരീഷ് ദാമോദറാണ് ചിത്രത്തിന്റെ സംവിധാനം നിർവഹിക്കുന്നത്. രഞ്ജിത്ത് എം. പത്മകുമാർ തുടങ്ങിയവരുടെ സഹസംവിധായകനായി നിരവധി വർഷം പ്രവർത്തിച്ച ആളാണ് ഗിരീഷിന്റെ ദാമോദർ. ചിത്രത്തിൽ പ്രതിഫലം വാങ്ങാതെയാണ് മമ്മൂട്ടി അഭിനയിച്ചത് എന്ന വാർത്ത കഴിഞ്ഞ ദിവസം പുറത്തുവന്നിരുന്നു. ചിത്രത്തിലെ കഥാപാത്രവും കഥയും അദ്ദേഹത്തെ അത്രമേൽ സ്വാധീനിച്ചു എന്നാണ് വരുന്ന വാർത്തകൾ. അങ്ങനെയെങ്കിൽ ഇന്നേവരെ കാണാത്ത മമ്മൂട്ടിയുടെ മറ്റൊരു മികച്ച കഥാപാത്രത്തെ ചിത്രത്തിലൂടെ കാണാനാകുമെന്ന് പ്രതീക്ഷിക്കാം. ചിത്രത്തിൽ മമ്മൂട്ടിയോടൊപ്പം ജോയ് മാത്യു, മുത്തുമണി, കെ. പി. എ. സി. ലളിത, കാർത്തിക, തുടങ്ങിയവർ അഭിനയിക്കുന്നു. സജി സെബാസ്ററ്യൻ, സരിത ജോയ് മാത്യു എന്നിവർ ചേർന്നാണ് ചിത്രത്തിന്റെ നിർമ്മാണം.ചിത്രം ഉടൻ തിയേറ്ററുകളിലേക്ക് എത്തും.