അബ്രഹാമിന്റെ സന്തതികളിൽ മമ്മൂട്ടി ഡബിൾ റോളോ ? ഇരട്ട മുഖമുള്ള പുതിയ പോസ്റ്റർ ആരാധകരിൽ ആകാംക്ഷയുണർത്തുന്നു..!

മെഗാ സ്റ്റാർ മമ്മൂട്ടിയുടെ ഈ വർഷത്തെ നാലാമത്തെ ചിത്രമായ അബ്രഹാമിന്റെ സന്തതികൾ അടുത്ത മാസം റിലീസിന് ഒരുങ്ങുകയാണ്. നവാഗതനായ ഷാജി പാടൂർ സംവിധാനം ചെയ്ത ഈ ചിത്രത്തിന് തിരക്കഥ രചിച്ചിരിക്കുന്നത് ഗ്രേറ്റ് ഫാദർ എന്ന സൂപ്പർ ഹിറ്റ് മമ്മൂട്ടി ചിത്രത്തിന്റെ സംവിധായകൻ ആയിരുന്ന ഹനീഫ് അദനി ആണ് . മമ്മൂട്ടിക്ക് വേണ്ടി ഡെറിക് എബ്രഹാം എന്ന പേരിൽ ഒരു മാസ്സ് പോലീസ് ഓഫീസർ കഥാപാത്രത്തെയാണ് ഈ ചിത്രത്തിൽ ഹനീഫ് അദനി സൃഷ്ടിച്ചിരിക്കുന്നത്. ഈ ചിത്രത്തിന്റെ ഫസ്റ്റ് ലുക്ക് പോസ്റ്ററും സെക്കന്റ് ലുക്ക് പോസ്റ്ററും കുറച്ചു നാൾ മുൻപ് ഇറങ്ങുകയും മികച്ച പ്രേക്ഷക പ്രതികരണം നേടിയെടുക്കുകയും ചെയ്തിരുന്നു. കഴിഞ്ഞ ദിവസമാണ് ഈ ചിത്രത്തിന്റെ മൂന്നാമത്തെ പോസ്റ്റർ വരുന്നത്.

മമ്മൂട്ടിയുടെ രണ്ടു വ്യത്യസ്ത ഗെറ്റപ്പുകൾ പകുതി വെച്ച് കൂട്ടി ചേർത്ത് ഒറ്റ മുഖമാക്കിയ പോലത്തെ ഒരു പോസ്റ്റർ ആണ് ഇന്നലെ പുറത്തു വന്നത്. താടിയും മീശയും നരയുമുള്ള സാൾട് ആൻഡ് പെപ്പർ ശൈലിയിൽ ഒരു ഗെറ്റപ്പും അതുപോലെ താടിയില്ലാതെ പിരിച്ചു വെച്ച മീശയോടെ ഉള്ള മറ്റൊരു ഗെറ്റപ്പുമാണ് നമ്മുക്ക് പോസ്റ്ററുകളിൽ കാണാൻ കഴിയുന്നത്. ഇതോടെ മമ്മൂട്ടി ഈ ചിത്രത്തിൽ ഡബിൾ റോൾ ആണോ ചെയ്യുന്നത് എന്ന രീതിയിൽ ഉള്ള ചർച്ചകൾ സോഷ്യൽ മീഡിയയിൽ ആരംഭിച്ചു കഴിഞ്ഞു. ഈ പുതിയ പോസ്റ്റർ ആരാധകരെ ഒരേ സമയം ആവേശത്തിലും ആകാംഷയിലുമാഴ്ത്തി എന്ന് തന്നെ പറയാം. വരുന്ന ജൂൺ പതിനാറിന് ആണ് ഈ ചിത്രം തീയേറ്ററുകളിൽ എത്തുക. ഗുഡ് വിൽ എന്റർടൈൻമെൻറ്സിന്റെ ബാനറിൽ ജോബി ജോർജ് ആണ് ഈ ചിത്രം നിർമ്മിച്ചിരിക്കുന്നത്. ജോബി ജോർജ് ഇതിനു മുൻപ് നിർമ്മിച്ച മമ്മൂട്ടി ചിത്രമായ കസബയിലും മെഗാ സ്റ്റാർ എത്തിയത് പോലീസ് ഓഫീസർ ആയാണ്.