മമ്മൂട്ടി ചിത്രവുമായി മാർത്താണ്ഡൻ വീണ്ടും; ദൈവത്തിന്റെ സ്വന്തം ക്‌ളീറ്റസ് ടീം ഒന്നിക്കുന്നു

മലയാളത്തിന്റെ മെഗാസ്റ്റാർ മമ്മൂട്ടി വീണ്ടും മാർത്താണ്ഡൻ ഒരുക്കുന്ന ചിത്രത്തിൽ നായകനാവുന്നു. മമ്മൂട്ടിയെ നായകനാക്കി മാർത്താണ്ഡൻ ഒരു ചിത്രമൊരുക്കുന്ന വിവരം പുറത്ത് വിട്ടത് പ്രശസ്ത ഗാനരചയിതാവായ രാജീവ് ആലുങ്കലാണ്. മാർത്താണ്ഡൻ ഒരുക്കുന്ന മമ്മൂട്ടി ചിത്രത്തിന് വേണ്ടിയാണു താൻ ഇനി ഗാനങ്ങൾ രചിക്കാൻ പോകുന്നതെന്ന് ഒരു ഓൺലൈൻ മാധ്യമത്തിന് നൽകിയ അഭിമുഖത്തിൽ രാജീവ് ആലുങ്കൽ വെളിപ്പെടുത്തി.

മമ്മൂട്ടിയെ നായകനാക്കി ദൈവത്തിന്റെ സ്വന്തം ക്ളീറ്റസ് എന്ന ചിത്രമൊരുക്കിയാണ് മാർത്താണ്ഡൻ മലയാള സിനിമയിൽ സംവിധായകനായി അരങ്ങേറ്റം കുറിച്ചത്. ബെന്നി പി നായരമ്പലം രചിച്ച ഈ ചിത്രം 2013 ലാണ് റിലീസ് ചെയ്തത്. അതിന് ശേഷം മമ്മൂട്ടിയെ തന്നെ നായകനാക്കി അച്ഛാ ദിൻ എന്ന ചിത്രവും മാർത്താണ്ഡൻ ഒരുക്കി. 2015 -ൽ റിലീസ് ചെയ്ത ഈ ചിത്രം രചിച്ചത് വിജീഷ് എ സി ആണ്.

ശേഷം പൃഥ്വിരാജ് നായകനായ പാവാട, കുഞ്ചാക്കോ ബോബൻ നായകനായ ജോണി ജോണി യെസ് അപ്പ, റോഷൻ മാത്യു, ഷൈൻ ടോം ചാക്കോ എന്നിവർ നായകന്മാരായ മഹാറാണി എന്നിവയും അദ്ദേഹം സംവിധാനം ചെയ്തു. 1996 മുതൽ മലയാള സിനിമയിൽ അസ്സോസിയേറ്റ് ഡയറക്ടർ ആയി ജോലി ചെയ്തിട്ടുള്ള മാർത്താണ്ഡൻ, രാജീവ് നാഥ്, നിസാർ, അൻവർ റഷീദ്, രഞ്ജി പണിക്കർ, ലാൽ, ഷാഫി, രഞ്ജിത്ത്, മാർട്ടിൻ പ്രക്കാട്ട്, ടി കെ രാജീവ് കുമാർ, ഷാജി കൈലാസ് തുടങ്ങിയ പ്രമുഖ സംവിധായകർക്കൊപ്പമെല്ലാം ജോലി ചെയ്തിട്ടുള്ള ആളാണ്.