കുറുപ്പിനായി ദുല്‍ഖര്‍ ഫോണ്‍ അടിച്ചു മാറ്റിയതാണോ; സത്യം വെളിപ്പെടുത്തി മമ്മൂട്ടി..!

മെഗാ സ്റ്റാർ മമ്മൂട്ടിയുടെ ഭീഷ്മ പര്‍വം എന്ന ചിത്രത്തിനായുള്ള കാത്തിരിപ്പിലാണ് ഇപ്പോൾ ആരാധകരും സിനിമാ പ്രേമികളും. മാർച്ച് മൂന്നിന് ആണ് ഈ ചിത്രം ആഗോള റിലീസ് ആയി എത്തുന്നത്. എന്നാൽ അതേ ദിവസം തന്നെ മമ്മൂട്ടിയുടെ മകനും യുവ താരവുമായ ദുല്‍ഖർ സൽമാൻ അഭിനയിച്ച തമിഴ് ചിത്രമായ ഹേ സിനാമികയും റിലീസ് ആവുന്നുണ്ട്. ആദ്യമായാണ് തെന്നിന്ത്യൻ സിനിമയിൽ അച്ഛനും മകനും നായകന്മാരായി അഭിനയിച്ച ചിത്രങ്ങൾ ഒരേ ദിവസം റിലീസ് ചെയ്യുന്നത് എന്ന പ്രത്യേകതയും ഇതിനുണ്ട്. സാധാരണ ദുല്‍ഖറിന്റെ ചിത്രങ്ങള്‍ക്കായി മമ്മൂട്ടി പ്രമോഷന്‍ ചെയ്യാറില്ല എന്നതും എല്ലാവർക്കും അറിയാം. എന്നാൽ ദുല്‍ഖർ നായകനായ കുറുപ്പ് എന്ന ചിത്രത്തിന്റെ റിലീസ് സമയത്തു ആ ചിത്രത്തിന്റെ പ്രമോഷൻ ചെയ്തു കൊണ്ട് മമ്മൂട്ടി സോഷ്യൽ മീഡിയയിൽ പോസ്റ്റുകൾ ഇട്ടു. അതിനെക്കുറിച്ച് ദുല്‍ഖർ പറഞ്ഞത് താന്‍ തന്നെ, വാപ്പയുടെ ഫോണ്‍ അടിച്ചു മാറ്റി ചെയ്തതാണെന്ന് ആണ്.

ഇപ്പോഴിതാ അതിലെ സത്യം എന്താണെന്നു വെളിപ്പെടുത്തുകയാണ് മമ്മൂട്ടി. ജിഞ്ചര്‍ മീഡിയ എന്റര്‍ടെയ്ന്‍മെന്റിന് നല്‍കിയ അഭിമുഖത്തില്‍ ആണ് മമ്മൂട്ടി ഇത് പറയുന്നത്. താൻ ഉറങ്ങി കിടക്കുമ്പോള്‍ ഫോണ്‍ എടുത്തോട്ടെ എന്ന് ചോദിച്ചിട്ട് എടുത്തുകൊണ്ട് പോയതാണ് എന്നും സത്യം ഇതാണെന്നും മമ്മൂട്ടി പറയുന്നു. പക്ഷെ നമ്മൾ അത് വിളിച്ചു കൂവരുതല്ലോ എന്നും മമ്മൂട്ടി പറയുന്നു. ബിഗ് ബി വന്നു പതിനഞ്ചു വർഷം കഴിഞ്ഞാണ് ഭീഷ്മ പർവ്വം എന്ന ചിത്രത്തിലൂടെ അമൽ നീരദിനൊപ്പം ഒന്നിച്ചതെന്നും ഒരു സംവിധായകൻ എന്ന നിലയിൽ അയാൾ ഒരുപാട് വളർന്നിട്ടുണ്ട് എന്നും മമ്മൂട്ടി പറഞ്ഞു. ബിഗ് ബി യിലെ ബിലാലിനെ പോലെയല്ല ഭീഷ്മ പര്‍വത്തിലെ മൈക്കിളെന്നും മമ്മൂട്ടി വിശദീകരിക്കുന്നു.