മമ്മൂട്ടിയോ മോഹന്‍ലാലോ? തന്റെ പ്രിയപ്പെട്ട നടൻ ആരാണെന്ന് വ്യക്തമാക്കി വിജയ് സേതുപതി

മമ്മൂട്ടിയെ ആണോ മോഹൻലാലിനെയാണോ ഇഷ്ടം എന്ന ചോദ്യം ആരാധകരെ പോലെ തന്നെ മിക്ക താരങ്ങളും നേരിടാറുണ്ട്. ഏഷ്യവിഷൻ അവാർഡ് ചടങ്ങിൽ തമിഴ് താരം വിജയ് സേതുപതിക്കും ഈ ചോദ്യം നേരിടേണ്ടതായി വന്നു. മമ്മൂട്ടിയെയാണോ മോഹന്‍ലാലിനെയാണോ ഏറ്റവും ഇഷ്ടമെന്ന് അവതാരക ചോദിച്ചപ്പോള്‍ അദ്ദേത്തിന്റെ മറുപടി മോഹന്‍ലാല്‍ എന്നായിരുന്നു.

മോഹൻലാലിൻറെ തന്മാത്രയിൽ അഭിനയത്തെ പുകഴ്ത്താനും വിജയ് മറന്നില്ല. തന്മാത്രയിലെ അഭിനയം കണ്ട് തകർന്ന് പോയെന്നും ജീവിതത്തിലൊരിക്കലെങ്കിലും അതുപോലെ അഭിനയിക്കാൻ ആഗ്രഹമുണ്ടെന്നും വിജയ് പറഞ്ഞു. മോഹൻലാലിൻറെ കഥാപാത്രം വീടും ഓഫീസും പരസ്പരം തിരിച്ചറിയാതെ, അടിവസ്ത്രം മാത്രം ധരിച്ച് നടക്കുന്ന സീന്‍ അവിശ്വസനീയവും അസാധ്യവുമാണെന്നും വിജയ് വ്യക്തമാക്കി. രാജമാണിക്യത്തിലെ മമ്മൂട്ടിയുടെ അഭിനയത്തേയും വിജയ് സേതുപതി പുകഴ്ത്തി. മമ്മൂട്ടിയുടെ അഭിനയം ആര്‍ക്കും പകരം വെയ്ക്കാന്‍ കഴിയാത്തതാണ്. തൊണ്ടിമുതലും ദൃക്‌സാക്ഷിയും ഒരുപാടിഷ്ടപ്പെട്ടെന്നും ഫഹദും ദുല്‍ഖറും നല്ല നടന്മാരാണെന്നും വിജയ് സേതുപതി കൂട്ടിച്ചേര്‍ത്തു.