തിരക്കഥ തയ്യാറാക്കിയിരിക്കുന്നത് മൂന്നു വർഷം സമയം എടുത്തു; പ്രതീക്ഷകൾ വാനോളമുയർത്തി മെഗാസ്റ്റാർ ചിത്രം

മലയാള സിനിമാ പ്രേമികൾ ഏറെ ഇഷ്ടപെടുന്ന ഒരു മമ്മൂട്ടി കഥാപാത്രം ആണ് സേതു രാമയ്യർ എന്ന സി ബി ഐ ഉദ്യോഗസ്ഥൻ. എസ് എൻ സ്വാമി രചിച്ചു കെ മധു സംവിധാനം ചെയ്ത ഒരു സി ബി ഐ ഡയറികുറിപ്പ് എന്ന ചിത്രത്തിലൂടെയാണ് ഈ ബുദ്ധി രാക്ഷസനായ സി ബി ഐ ഓഫീസർ നമ്മുടെ മുന്നിൽ എത്തിയത്. സൂപ്പർ ഹിറ്റായി മാറിയ ഈ ചിത്രത്തിന് പിന്നീട് മൂന്നു ഭാഗങ്ങൾ കൂടി ഉണ്ടായി. ജാഗ്രത, സേതു രാമയ്യർ സി ബി ഐ, നേരറിയാൻ സി ബി ഐ എന്നീ ചിത്രങ്ങൾ ആയിരുന്നു അവ. ആദ്യ ഭാഗം കഴിഞ്ഞു രണ്ടാം ഭാഗമായ ജാഗ്രത ഒരുപാട് വൈകാതെ എത്തിയെങ്കിലും ആദ്യ ഭാഗത്തിന്റെ സ്വീകാര്യത രണ്ടാം ഭാഗത്തിന് കിട്ടാതെ  വന്നപ്പോൾ മൂന്നാം ഭാഗം എത്തിയത് ഒരുപാട് വൈകിയാണ്. മൂന്നാം ഭാഗം ആ വർഷത്തെ ഏറ്റവും വലിയ ഹിറ്റായി മാറിയപ്പോൾ അധികം വൈകാതെ തന്നെ  നാലാം ഭാഗവും എത്തി.

എന്നാൽ രണ്ടാം ഭാഗമായ ജാഗ്രതയെ  പോലെ നാലാം ഭാഗവും വലിയ ജനപിന്തുണ നേടിയില്ല. ഇപ്പോഴിതാ പതിമൂന്നു വർഷങ്ങൾക്കു ശേഷം ഈ സീരിസിലെ അഞ്ചാമത്തേയും അവസാനത്തേയും ഭാഗവുമായി എത്താൻ പോവുകയാണ് കെ മധു- എസ് എൻ സ്വാമി ടീം. മമ്മൂട്ടി നായകനാവുന്ന ഈ ചിത്രം ഈ വർഷം ആരംഭിക്കും എന്ന് മൂവി സ്ട്രീറ്റ് അവാർഡ്‌സിൽ വെച്ച് എസ് എൻ സ്വാമി പ്രഖ്യാപിച്ചു. താൻ മൂന്നു വർഷം സമയം എടുത്തു തയ്യാറാക്കിയ തിരക്കഥ ആണിത് എന്നും ഈ ചിത്രം മലയാളത്തിലെ ഭാവി ത്രില്ലർ ചിത്രങ്ങളെ ഡിഫൈൻ ചെയ്യുന്ന സിനിമ ആയിരിക്കും എന്നും എസ് എൻ സാമി പറഞ്ഞു. ഏതായാലും മമ്മൂട്ടി ആരാധകരെ ആവേശം കൊള്ളിക്കുന്ന വാർത്തയാണ് ഇതെന്ന് നിസംശയം പറയാം.