മലൈക്കോട്ടെെ വാലിബന്‍ മലയാള സിനിമയിലെ തന്നെ ഒരു ടേണിംഗ് പോയിന്റാണ്; കൂടുതൽ വെളിപ്പെടുത്തി രചയിതാവ്

മലയാളത്തിന്റെ മഹാനടൻ മോഹൻലാലിനൊപ്പം ജീനിയസ് സംവിധായകൻ ലിജോ ജോസ് പെല്ലിശ്ശേരി ആദ്യമായി കൈകോർക്കുന്നു എന്നത് കൊണ്ട് തന്നെ ഇന്ത്യ മുഴുവൻ കാത്തിരിക്കുന്ന ചിത്രങ്ങളിലൊന്നായി മാറിയിരിക്കുകയാണ് മലൈക്കോട്ടൈ വാലിബൻ. അടുത്തയാഴ്ച ഷൂട്ടിംഗ് ആരംഭിക്കാൻ പോകുന്ന ഈ ചിത്രം രചിച്ചിരിക്കുന്നത് ആമേൻ പോലത്തെ സൂപ്പർ ഹിറ്റ് ചിത്രങ്ങൾ ലിജോ ജോസ് പെല്ലിശ്ശേരിക്കൊപ്പം ചേർന്ന് നമ്മുക്ക് സമ്മാനിച്ച രചയിതാവ് പി എസ് റഫീഖ് ആണ്. ഇപ്പോഴിതാ, ദി ക്യൂ ഓൺലൈൻ മീഡിയക്ക് നൽകിയ അഭിമുഖത്തിൽ ഈ ചിത്രത്തെ കുറിച്ച് കൂടുതൽ വെളിപ്പെടുത്തുകയാണ് അദ്ദേഹം. മോഹന്‍ലാല്‍ ആരാധകരെയും മലയാളി പ്രേക്ഷകനെയും ഒരുപോലെ തൃപ്തിപ്പെടുത്തുന്ന സിനിമയായിരിക്കും മലൈക്കോട്ടൈ വാലിബൻ എന്ന് അദ്ദേഹം പറയുന്നു. മലയാള സിനിമയിലെ തന്നെയും, അതുപോലെ ഈ സിനിമയുമായി ബന്ധപ്പെട്ട് പ്രവര്‍ത്തിക്കുന്ന എല്ലാവരുടെയും കരിയറിലെ തന്നെയും ഒരു ടേണിംഗ് പോയിന്റായിരിക്കും ഈ സിനിമ എന്നും അദ്ദേഹം എടുത്തു പറയുന്നുണ്ട്.

മോഹന്‍ലാലിനെപ്പോലെയുള്ള ഒരു വലിയ നടന്‍ ഇതിന്റെ ഭാഗമായതാണ് തങ്ങളുടെ ധൈര്യമെന്നും, അതുപോലെ തന്റെ മറ്റ് സിനിമകളേക്കാള്‍ ഒരുപടി മുന്നില്‍ നില്‍ക്കാനുള്ള ശ്രമമാണ് ഈ സിനിമയിലൂടെ ലിജോ നടത്താൻ പോകുന്നതെന്നും പി എസ് റഫീഖ് വെളിപ്പെടുത്തി. ലോക സിനിമയിലെ തന്നെ നടന്മാരില്‍ പ്രധാനിയാണ് മോഹന്‍ലാല്‍ എന്ന് പറഞ്ഞ പി എസ് റഫീഖ്, നടനെന്ന നിലയിലും താരമെന്ന നിലയിലും ഏറ്റവും മികച്ച രീതിയിൽ അദ്ദേഹത്തെ ഉപയോഗിക്കാനുള്ള ശ്രമമാണ് ഈ ചിത്രമെന്നും കൂട്ടിച്ചേർക്കുന്നു. ലിജോ ജോസ് പെല്ലിശ്ശേരിയുടെ മേക്കിങ്ങിലെ പ്രത്യേകത ഈ ചിത്രത്തിനുമുണ്ടാകുമെന്നും അദ്ദേഹത്തിന്റെ മറ്റെല്ലാ ചിത്രങ്ങളെയും പോലെ ഒരു വിഷ്വല്‍ ട്രീറ്റ് തന്നെയായിരിക്കും മലൈക്കോട്ടൈ വാലിബനെന്നും റഫീഖ് പറയുന്നു. മനസിലെ പെര്‍ഫെക്ഷനോട് നീതി പുലര്‍ത്താത്തതൊന്നും ചെയ്യാത്ത ലിജോ എന്ന സംവിധായകനൊപ്പം, പൂർണ്ണമായ വിശ്വാസത്തോടെ മോഹൻലാൽ ചേരുമ്പോൾ, ആ വിശ്വാസത്തിന് കോട്ടം തട്ടാതിരിക്കാന്‍ കഴിവിന്റെ പരമാവധി പരിശ്രമം തങ്ങളുടെ ഭാഗത്ത് നിന്നുണ്ടാകുമെന്നും റഫീഖ് എടുത്തു പറയുന്നുണ്ട്.