ഒറ്റ ചാട്ടത്തിനു ഗേറ്റ് കടന്നു;വാച്ച്മാനെ ശല്യപ്പെടുത്തണ്ട, അയാളുറങ്ങിക്കോട്ടെ എന്ന് പ്രണവ്; മനസ്സ് തുറന്നു മാഫിയ ശശി..!

മലയാളത്തിന്റെ യുവ താരങ്ങളിലൊരാളായ പ്രണവ് മോഹൻലാൽ ഒരു നടനെന്ന നിലയിലും വ്യക്തിയെന്ന നിലയിലും ഇപ്പോൾ മലയാളി പ്രേക്ഷകരുടെ പ്രീയപെട്ടവരിൽ ഒരാളാണ്. ആദി, ഹൃദയം എന്നീ ചിത്രങ്ങളിലൂടെ ഒരു നടന്നെന്ന നിലയിൽ വലിയ കയ്യടി നേടിയ പ്രണവ് ഏറ്റവും കൂടുതൽ ആരാധകരെ സൃഷ്ടിച്ചത് തന്റെ വ്യക്തിത്വം കൊണ്ടാണ്. ലളിത ജീവിതം നയിക്കുന്ന, സാധാരണക്കാരുടെ ഇടയിൽ അവരെപ്പോലെ നടക്കുന്ന, യാത്രകളെ ഒരുപാട് സ്നേഹിക്കുന്ന, സാഹസികതയെ സ്നേഹിക്കുന്ന ഈ ചെറുപ്പക്കാരൻ ഇന്ന് മലയാളി യുവാക്കളുടെ റോൾ മോഡലുകളിൽ ഒന്നാണെന്ന് പറഞ്ഞാലും അതിൽ അതിശയോക്തിയില്ല. സിനിമ ഇന്ഡസ്ട്രിയിലുള്ളവർക്കും പ്രണവിനെ കുറിച്ച് പറയാൻ നൂറു നാവാണ്. ഇതുപോലൊരു മകനെ കിട്ടാൻ ആരുമാഗ്രഹിക്കുമെന്നു നടന്മാരായ സിദ്ദിഖ്, മനോജ് കെ ജയനെന്നിവർ പറഞ്ഞത് സോഷ്യൽ മീഡിയയിൽ വൈറലാണ്.

പർവ്വതാരോഹണം, ജിംനാസ്റ്റിക്, സർഫിങ്, സ്‌കേറ്റിങ്, പാർക്കർ തുടങ്ങിയെല്ലാം വശമുള്ള പ്രണവിന്റെ സാഹസികതയും അതുപോലെ മാനുഷിക വശവും ഒരുപോലെ കാണിച്ചു തരുന്ന ഒരു സംഭവമാണ് പ്രശസ്ത സംഘട്ടന സംവിധായകൻ മാഫിയ ശശിക്കു പറയാനുള്ളത്. ഒരിക്കൽ രാത്രി താനും പ്രണവും കൂടി കാറിൽ വീട്ടിലേക്കു വരികയായിരുന്നെന്നും പ്രണവിനെ വീട്ടിൽ വിട്ടിട്ടു വേണം തനിക്കു പോകാനെന്നും അദ്ദേഹം പറയുന്നു. അങ്ങനെ ലാലേട്ടന്റെ വീടിനു മുന്നിൽ എത്തി. അദ്ദേഹത്തിന്റെ വീട്ടിലെ ഗേറ്റ് വളരെ ഉയരം കൂടിയ ഒന്നാണ്. എന്നാൽ കാറിൽ നിന്നിറങ്ങിയ ഉടൻ പ്രണവ് ഒരൊറ്റ നിമിഷം കൊണ്ട് തന്റെ ബാഗ് ഗേറ്റിന് മുകളിലൂടെ അകത്തേക്കിട്ടു ഒറ്റ ചാട്ടത്തിനു അകത്തു കടന്നെന്നും, എന്താ ഗേറ്റ് തുറന്നു കേറാത്തതു എന്ന് ചോദിച്ചപ്പോൾ വാച്ച്മാനെ ശല്യപ്പെടുത്തണ്ട, അയാളുറങ്ങിക്കോട്ടെ എന്നായിരുന്നു പ്രണവിന്റെ മറുപടിയൊന്നും മാഫിയ ശശി പറയുന്നു. ഒരു പ്രത്യേക വ്യക്തിത്വമാണ് അവന്റേതെന്നും മാഫിയ ശശി പറഞ്ഞു.