മധുര രാജ സൂപ്പർ മെഗാ ഹിറ്റ് ആവും എന്ന് സലിം കുമാർ….

മോഹൻലാൽ നായകനായി എത്തിയ പുലിമുരുകൻ എന്ന ഐതിഹാസിക വിജയ ചിത്രത്തിന് ശേഷം വൈശാഖ് സംവിധാനം ചെയ്ത ചിത്രമാണ് മെഗാ സ്റ്റാർ മമ്മൂട്ടി നായകനായ മധുര രാജ. 2010 ഇൽ റീലീസ് ചെയ്ത വൈശാഖിന്റെ ആദ്യ ചിത്രമായ പോക്കിരി രാജയിലെ മമ്മൂട്ടി അവതരിപ്പിച്ച രാജ എന്ന കഥാപാത്രത്തെ അധികരിച്ച് എടുത്തിട്ടുള്ള മധുര രാജ ഈ വരുന്ന ഏപ്രിൽ 12 ന് റിലീസ് ചെയ്യും. ഇപ്പോഴിതാ മധുര രാജയുടെ പ്രമോഷന്റെ ഭാഗമായി ഉള്ള റോഡ് ഷോയിൽ പങ്കെടുക്കവേ ഈ ചിത്രത്തിൽ ഒരു പ്രധാന വേഷം ചെയ്ത സലിം കുമാർ പറഞ്ഞത് മധുര രാജ സൂപ്പർ ഹിറ്റ് ആവും എന്നാണ്. സലിം കുമാറിന്റ വാക്കുകൾ മമ്മൂട്ടി ആരാധകരുടെ ആവേശം ഇരട്ടിപ്പിച്ചു കഴിഞ്ഞു.

മലയാള സിനിമ ഇത്‌ വരെ കാണാത്ത വമ്പൻ ഗ്രാഫിക്സ് വിസ്മയം ആണ് ഈ ചിത്രത്തിൽ ഒരുങ്ങുന്നത് എന്നാണ് സലിം കുമാർ പറയുന്നത്. പോക്കിരി രാജയിൽ നമ്മൾ കണ്ട മമ്മൂട്ടി ആയിരിക്കില്ല മധുര രാജയിൽ നിങ്ങൾ കാണാൻ പോകുന്നത് എന്നും സലിം കുമാർ പറയുന്നു. നെൽസൻ ഐപ്പ് എന്ന പുതിയ നിർമ്മാതാവു നിർമ്മിച്ച ഈ ചിത്രത്തിന്റെ ബജറ്റ് മുപ്പതു കോടിയോളം ആണെന്നാണ് സൂചന. ഉദയ കൃഷ്ണ തിരക്കഥ രചിച്ച ഈ ചിത്രം വിതരണം ചെയ്യുന്നത് ഉദയ കൃഷ്ണയുടെ തന്നെ യൂകെ സ്റ്റുഡിയോസ് ആണ്. ഒരു മാസ് എന്റർടൈന്മെന്റ് ചിത്രമായി ഒരുക്കിയ ഈ ചിത്രത്തിന്റെ ടീസർ വലിയ ശ്രദ്ധ നേടിയിരുന്നു. പീറ്റർ ഹെയ്ൻ ആണ് മധുര രാജയുടെ സ്റ്റണ്ട് ഡയറക്ടർ.