മാർജാര ഒരു കല്ലു വെച്ച നുണയിൽ രാജേഷ് ശർമയും; ചിത്രം ജനുവരി മൂന്നു മുതൽ

മാർജാര ഒരു കല്ലു വെച്ച നുണ എന്ന ചിത്രത്തിൽ ഒരു ഗംഭീര വേഷം ചെയ്തു കൊണ്ട് പ്രശസ്ത നടൻ രാജേഷ് ശർമയും നമ്മുടെ മുന്നിൽ എത്തുകയാണ്. ഈ വരുന്ന ജനുവരി മൂന്നിന് ആണ് ഈ ചിത്രം റിലീസ് ചെയ്യാൻ പോകുന്നത്. മൂന്നു തവണ മികച്ച നാടക നടനുള്ള അവാർഡ് നേടിയിട്ടുള്ള രാജേഷ് ശർമ്മ ഡോ. ബിജു സംവിധാനം നിർവ്വഹിച്ച സൈറ എന്ന ചിത്രത്തിലൂടെയാണ് സിനിമയിൽ സജീവമായത്. ഒട്ടേറെ മലയാള സിനിമകളിൽ ചെറുതും വലുതുമായ വേഷങ്ങളിൽ അഭിനയിച്ച അദ്ദേഹം പോപ്പുലർ ആയത് വിപിൻ ആറ്റ്‌ലി ഒരുക്കിയ ഹോമിലി മീൽസ് എന്ന ചിത്രത്തിലെ മോസപ്പൻ എന്ന കഥാപാത്രത്തിലൂടെയാണ്. ഇപ്പോൾ ഒരു മികച്ച കഥാപാത്രമാണ് മാർജാര ഒരു കല്ലുവച്ച നുണ എന്ന ചിത്രത്തിലും അദ്ദേഹം ചെയ്തിരിക്കുന്നത് എന്നാണ് സൂചന.

ചന്ദ്രേട്ടൻ എന്നാണ് ഈ ചിത്രത്തിൽ അദ്ദേഹം അവതരിപ്പിക്കുന്ന കഥാപാത്രത്തിന്റെ പേര്. നവാഗതനായ രാകേഷ് ബാല സംവിധാനം ചെയ്ത ഈ ചിത്രം മുല്ലപ്പള്ളി പ്രൊഡക്ഷൻസിന്റെ ബാനറിൽ ചാക്കോ മുല്ലപ്പള്ളിയാണ് നിർമ്മിച്ചിരിക്കുന്നത്. ജെയ്സൺ ചാക്കോ, ഹരീഷ്പേരടി, അഭിരാമി, രേണു സുന്ദർ, ടിനിടോം, അഞ്ജലി നായർ, കൊല്ലം സുധി, സുധീർ കരമന തുടങ്ങിയവരും അഭിനയിച്ച ഈ ചിത്രത്തിന് ജെറി ക്യാമറ ചലിപ്പിച്ചപ്പോൾ കിരൺ ജോസ് ആണ് സംഗീതം പകർന്നത്. ജിസ്സൺ ജോർജ്ജ് പശ്ചാത്തല സംഗീതം ഒരുക്കിയ ഈ ചിത്രം എഡിറ്റ് ചെയ്യുന്നത് പ്രശസ്ത എഡിറ്റർ ആയ ലിജോ പോൾ ആണ്. കംപ്ലീറ്റ് ആക്ടർ മോഹൻലാൽ ആണ് ഈ ചിത്രത്തിന്റെ ട്രയ്ലർ റിലീസ് ചെയ്തത്.