മഞ്ജുവുമായി ശത്രുതയില്ല, സിനിമ ആവശ്യപ്പെട്ടാൽ ഒന്നിച്ച് അഭിനയിക്കും: ദിലീപ്

ജനപ്രിയ നായകൻ ദിലീപ് നായകനായ പുതിയ ചിത്രമായ മൈ സാന്റാ ഇപ്പോൾ കേരളത്തിലെ നിറഞ്ഞ സദസ്സുകളിൽ പ്രദർശിപ്പിച്ചു കൊണ്ടിരിക്കുകയാണ്. സുഗീത് സംവിധാനം ചെയ്ത ഈ ചിത്രത്തിൽ ഒരു സാന്താ ക്ലോസ് ആയാണ് ദിലീപ് അഭിനയിച്ചിരിക്കുന്നത്. മൈ സാന്റായോടൊപ്പം തന്നെ ദിലീപിന്റെ ആദ്യ ഭാര്യയും മലയാളത്തിലെ ലേഡി സൂപ്പർ സ്റ്റാർ എന്ന വിശേഷണവുമുള്ള മഞ്ജു വാര്യർ നായികാ വേഷം ചെയ്ത റോഷൻ ആൻഡ്രൂസ് ചിത്രമായ പ്രതി പൂവൻ കോഴിയും ഗംഭീര പ്രേക്ഷക പ്രതികരണം നേടി തീയേറ്ററുകളിൽ മുന്നേറുകയാണ്. ഇപ്പോഴിതാ മലയാള മനോരമക്ക് നൽകിയ പുതിയ അഭിമുഖത്തിൽ മഞ്ജു വാര്യർക്കൊപ്പം അഭിനയിക്കുമോ എന്ന ചോദ്യത്തിന് മറുപടി പറഞ്ഞിരിക്കുകയാണ് ദിലീപ്.

മഞ്ജു വാര്യർ എന്ന നടിയുമായി തനിക്കു ഒരു ശത്രുതയും ഇല്ലെന്നും സിനിമ ആവശ്യപ്പെട്ടാൽ മഞ്ജുവുമൊത്തു അഭിനയിക്കുന്നതിൽ തനിക്കു ഒരു വിരോധവും ഇല്ലെന്നും ദിലീപ് പറയുന്നു. മലയാളത്തിലെ വനിതാ സിനിമാ പ്രവർത്തകരുടെ കൂട്ടായ്മ ആയ ഡബ്ലുസിസിയിൽ ഉള്ളവരെല്ലാം തന്റെ സഹപ്രവർത്തകർ ആണെന്നും അവർക്കെല്ലാം നല്ലതുവരാൻ ആഗ്രഹിക്കുന്നുവെന്നും ദിലീപ് കൂട്ടിച്ചേർത്തു. നടിയെ ആക്രമിച്ച കേസിൽ ദിലീപ് കുറ്റാരോപിതൻ ആയപ്പോൾ ദിലീപിന് എതിരെ ഏറ്റവും ശ്കതമായി രംഗത്ത് വന്നത് ഈ വനിതാ കൂട്ടായ്മ ആയ ഡബ്ലുസിസി ആയിരുന്നു എന്നതും ശ്രദ്ധേയമായ കാര്യമാണ്. അതുകൊണ്ട് തന്നെ ദിലീപ് ഇപ്പോൾ പറഞ്ഞിരിക്കുന്ന ഈ വാക്കുകൾ വളരെ പ്രാധാന്യം അർഹിക്കുന്ന ഒന്ന് തന്നെയാണ് എന്നാണ് ഏവരും ഒരേപോലെ അഭിപ്രായപ്പെടുന്നത്. സിനിമയിൽ ലഹരി വസ്തുക്കളുടെ ഉപയോഗത്തെക്കുറിച്ച് തനിക്കറിവില്ല എന്നും അതുപോലെ നടിയെ ആക്രമിച്ച കേസിൽ തനിക്കു അറിയാവുന്ന സത്യങ്ങൾ കേസ് അവസാനിച്ചതിന് ശേഷം തുറന്നു പറയും എന്നും ദിലീപ് വ്യക്തമാക്കി.