കണ്ടാൽ തന്നെ സ്പെല്ലിങ് മിസ്റ്റേക്ക് ഉള്ള നായകൻ; എക്സ്ട്രാ ഡീസെന്റിൽ സുരാജിനെ നായകനാക്കാനുള്ള കാരണം വെളിപ്പെടുത്തി ലിസ്റ്റിൻ സ്റ്റീഫൻ

സുരാജ് വെഞ്ഞാറമ്മൂട് നായകനായി എത്തുന്ന ആമിർ പള്ളിക്കൽ ചിത്രം എക്സ്ട്രാ ഡീസന്റ് ഡിസംബർ ഇരുപതിനാണ് റിലീസ് ചെയ്യുന്നത്. ലിസ്റ്റിൻ സ്റ്റീഫന്റെ മാജിക് ഫ്രെയിംസും സുരാജ് വെഞ്ഞാറമ്മൂടിന്റെ വിലാസിനി സിനിമാസും ചേർന്ന് നിർമ്മിച്ച ഈ ചിത്രം ആഷിഫ് കക്കോടിയാണ് രചിച്ചത്. ഇപ്പോഴിതാ ഈ ചിത്രത്തിൽ സുരാജിനെ തന്നെ നായകനാക്കാനുള്ള കാരണം വെളിപ്പെടുത്തുകയാണ് നിർമ്മാതാക്കളിൽ ഒരാളായ ലിസ്റ്റിൻ സ്റ്റീഫൻ.

സുരാജ് ഇതിൽ ഒരു സൈക്കോ കഥാപാത്രം ആയാണ് എത്തുന്നതെന്നാണ് ട്രൈലെർ സൂചിപ്പിക്കുന്നത്. സുരാജിന്റെ ലുക്കിൽ നിന്ന് തന്നെ ഈ കഥാപാത്രത്തെ പിടി കിട്ടുമെന്നും, ക്ലീൻ ഷേവ് ചെയ്ത് കണ്ണാടിയും വെച്ച് നിൽക്കുന്ന സുരാജിനെ കാണുമ്പോൾ തന്നെ ഒരു സ്പെല്ലിങ് മിസ്റ്റേക്ക് തോന്നുമെന്നും ആ തോന്നൽ വേറെ ആരെ നായകനാക്കിയാലും കിട്ടില്ല എന്നും ലിസ്റ്റിൻ സ്റ്റീഫൻ പറയുന്നത് സരസമായാണ്. സുരാജ് ഈ ചിത്രത്തിൽ അതിഗംഭീരമായാണ് അഭിനയിച്ചിരിക്കുന്നത് എന്നും ലിസ്റ്റിൻ വെളിപ്പെടുത്തി.

ഡാർക്ക് ഹ്യൂമർ ആയി ഒരുക്കിയ ഈ ചിത്രം കുടുംബ പ്രേക്ഷകരെയാണ് ലക്‌ഷ്യം വെക്കുന്നത്. ഗ്രേസ്‌ ആന്റണി, പ്രേമലു ഫെയിം ശ്യാം മോഹൻ, വിനയപ്രസാദ്‌, റാഫി, സുധീർ കരമന, ദിൽന, പ്രശാന്ത് അലക്‌സാണ്ടർ, ഷാജു ശ്രീധർ,സജിൻ ചെറുകയിൽ,വിനീത് തട്ടിൽ എന്നിവരും ചിത്രത്തിൽ പ്രധാന വേഷങ്ങൾ ചെയ്യുന്നു. ഷാരോൺ ശ്രീനിവാസ് ഛായാഗ്രഹണം നിർവഹിച്ച ഈ ചിത്രത്തിന് വേണ്ടി സംഗീതം ഒരുക്കിയിരിക്കുന്നത് അങ്കിത് മേനോനാണ്. ശ്രീജിത്ത് സാരംഗാണ് ചിത്രത്തിന്റെ എഡിറ്റർ.