‘ഇത് സ്വപ്ന സാക്ഷാത്കാരം’; മെഗാസ്റ്റാർ ചിത്രത്തിലൂടെ പുതിയ തുടക്കം കുറിച്ച് ലിന്റോ കുര്യൻ

സോഷ്യൽ മീഡിയയിലെ ട്രോൾ വീഡിയോസ്, ഹീറോ മാഷ് അപ് വീഡിയോസ് എന്നിവ എഡിറ്റ് ചെയ്ത് ഏറെ പ്രശസ്തനായ ട്രോളനാണ്‌ ലിന്റോ കുര്യൻ. മോഹൻലാൽ, മമ്മൂട്ടി, ദിലീപ്, പൃഥ്വിരാജ്, ദുൽകർ സൽമാൻ, ജയസൂര്യ, ഫഹദ് ഫാസിൽ തുടങ്ങി ഒട്ടേറെ പ്രമുഖ താരങ്ങളുടെ മാഷ് അപ് വീഡിയോസ് എഡിറ്റ് ചെയ്തിട്ടുള്ള ഈ യുവാവിന് അപ്രതീക്ഷിതമായി ആണ് സിനിമയിൽ നിന്നൊരു ഓഫർ ലഭിച്ചത്. മെഗാ സ്റ്റാർ മമ്മൂട്ടി നായകനായി എത്തുന്ന ഷൈലോക്ക് എന്ന ചിത്രത്തിന്റെ ടീസർ എഡിറ്റ് ചെയ്യാനുള്ള ക്ഷണം ആയിരുന്നു അത്. ഷൈലോക്ക് ടീം വാക്ക് പാലിച്ചു. ഇന്ന് റിലീസ് ചെയ്ത ഷൈലോക്കിന്റെ തമിഴ് പതിപ്പായ കുബേരന്റെ ടീസർ എഡിറ്റ് ചെയ്തിരിക്കുന്നത് ലിന്റോ കുര്യൻ ആണ്.

തന്റെ സ്വപ്നം സത്യമായ നിമിഷം ആണിത് എന്നാണ് ലിന്റോ കുര്യൻ പറയുന്നത്. മമ്മൂട്ടി ചിത്രത്തിന് ടീസർ കട്ട് ചെയ്യാൻ സാധിച്ചത് വലിയ ഭാഗ്യമായി കരുതുന്നു എന്നും ഇതിനു അവസരം നൽകിയ ഈ ചിത്രത്തിന്റെ രചയിതാക്കളായ ബിബിൻ മോഹൻ, അനീഷ് ഹമീദ് എന്നിവർക്കും അതുപോലെ ഈ സിനിമയുടെ മൊത്തം ടീമിനും നന്ദി പറയുകയാണ് ലിന്റോ കുര്യൻ. അജയ് വാസുദേവ് ഒരുക്കിയ ഈ ബിഗ് ബജറ്റ് മാസ്സ് ചിത്രത്തിന്റെ നിർമ്മാണം നിർവഹിച്ചിരിക്കുന്നത് ഗുഡ് വിൽ എന്റെർറ്റൈന്മെന്റിന്റെ ബാനറിൽ ജോബി ജോർജ് ആണ്. തമിഴിലും മലയാളത്തിലും ആയി എത്തുന്ന ഈ ചിത്രം ജനുവരി ഇരുപത്തിമൂന്നിനാണ് വേൾഡ് വൈഡ് റിലീസായി എത്തുന്നത്. ഈ വർഷത്തെ മമ്മൂട്ടിയുടെ ആദ്യ റിലീസായ ഷൈലോക്കിൽ മമ്മൂട്ടിക്കൊപ്പം രാജ് കിരൺ, മീന, ബിബിൻ ജോർജ്, ബൈജു, കലാഭവൻ ഷാജോൺ, സിദ്ദിഖ് എന്നിവരും അഭിനയിക്കുന്നുണ്ട്.