വീണ്ടും വിജയം നേടാൻ ബോബൻ സാമുവൽ; അൽ മല്ലു ഇന്ന് മുതൽ

പ്രശസ്ത സംവിധായകനായ ബോബൻ സാമുവൽ രചിച്ചു സംവിധാനം ചെയ്ത അൽ മല്ലു എന്ന ചിത്രം ഇന്ന് കേരളത്തിലെ തീയേറ്ററുകളിൽ എത്തുകയാണ്. നമിതാ പ്രമോദ് നായികാ വേഷം ചെയ്യുന്ന ഈ ചിത്രത്തിന്റെ ട്രൈലെർ, അതുപോലെ ദിവസങ്ങൾക്കു മുൻപ് പുറത്തു വന്ന ഇതിലെ വീഡിയോ സോങ് എന്നിവ വലിയ രീതിയിൽ പ്രേക്ഷക ശ്രദ്ധ നേടുകയും ചിത്രത്തെ കുറിച്ച് പ്രതീക്ഷ സമ്മാനിക്കുകയും ചെയ്തിരുന്നു. ഇന്ന് കേരളത്തിൽ റിലീസ് ചെയ്യുന്ന ഈ ചിത്രത്തിന്റെ തീയേറ്റർ ലിസ്റ്റ് ഇവിടെ ചേർക്കുന്നു. ജനപ്രിയൻ, ഹാപ്പി ജേർണി, റോമൻസ്, ഷാജഹാനും പരീക്കുട്ടിയും, വികട കുമാരൻ എന്നീ ചിത്രങ്ങൾ ആണ് ബോബൻ സാമുവൽ ഇതിനു മുൻപേ നമ്മുക്ക് സമ്മാനിച്ചത്.

ജോസഫിലെ ഗാനങ്ങൾക്ക് ഈണം നൽകി പ്രേക്ഷക ശ്രദ്ധ നേടിയ രഞ്ജിൻ രാജ് സംഗീതം ഒരുക്കിയ ഈ ചിത്രത്തിന് ദൃശ്യങ്ങൾ നൽകിയത് വിവേക് മേനോൻ ആണ്. ഈ ചിത്രം എഡിറ്റ് ചെയ്തിരിക്കുന്നത് ദീപു ജോസഫും നിർമ്മിച്ചിരിക്കുന്നത് മെഹ്ഫിൽ പ്രൊഡക്ഷൻസിന്റെ ബാനറിൽ സജിൽസ് മജീദും ആണ്. മിയ,സിദ്ധിഖ്, ലാൽ, പ്രേം പ്രകാശ്, ഫാരിസ്, മിഥുന്‍ രമേശ്, ധര്‍മ്മജന്‍ ബോള്‍ഗാട്ടി, സോഹൻ സീനുലാൽ, ഷീലു ഏബ്രഹാം, രശ്മി ബോബൻ, സിനില്‍ സൈനുദ്ദീന്‍, വരദ ജിഷിന്‍, ജെന്നിഫര്‍, അനൂപ് തുടങ്ങി ഒരു വലിയ താര നിര തന്നെ ഈ ചിത്രത്തിൽ അണിനിരന്നിട്ടുമുണ്ട്. പ്രവാസിയായ ഒരു മലയാളി പെൺകുട്ടിയുടെ ജീവിതത്തിൽ സംഭവിക്കുന്ന കാര്യങ്ങൾ ആണ് ഈ ചിത്രം അവതരിപ്പിക്കുന്നതെന്ന് ഇതിന്റെ ട്രൈലെർ നമ്മോടു പറയുന്നു. ഏതായാലും ഒരു ക്ലീൻ എന്റർറ്റെയിനെർ ആയിരിക്കും ഈ ചിത്രമെന്ന സൂചനയാണ് ലഭിക്കുന്നത്.