ഇട്ടിമാണിയായി മോഹൻലാലിന്റെ മെഗാ മാർഗ്ഗം കളി; ലൊക്കേഷൻ ചിത്രങ്ങൾ തരംഗമാകുന്നു..!

ഇന്നലെയാണ് താര ചക്രവർത്തി മോഹൻലാൽ നായകനായി എത്തുന്ന ഇട്ടിമാണി മേഡ് ഇൻ ചൈന എന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തത്. മാർഗ്ഗം കളിയുടെ ചുവടു വെച്ച് കൊണ്ട് ചട്ടയും മുണ്ടും ധരിച്ച മോഹൻലാലിന്റെ ഇട്ടിമാണി ഗെറ്റപ്പ് നിമിഷങ്ങൾ കൊണ്ടാണ് സോഷ്യൽ മീഡിയയിൽ വൈറൽ ആയതു. ആ ഒരൊറ്റ പോസ്റ്റർ കൊണ്ട് കുട്ടികളിലേക്കും കുടുംബങ്ങളിലേക്കും ഇറങ്ങി ചെന്നു ഇട്ടിമാണി എന്ന് പറയാം. ഇപ്പോഴിതാ ഈ ചിത്രത്തിന്റെ ഇന്നത്തെ ഷൂട്ടിംഗ് സ്റ്റില്ലുകളും വൈറൽ ആവുകയാണ്. മാർഗ്ഗം കളിയുടെ വേഷത്തിൽ ഉള്ള മോഹൻലാലിനൊപ്പം അതേ വേഷത്തിൽ സലിം കുമാർ , ജോണി ആന്റണി , ഹാരിഷ് കണാരൻ, അരിസ്റ്റോ സുരേഷ്, ധർമജൻ എന്നിവരും ഉണ്ട്.

പള്ളീലച്ചനായി സിദ്ദിഖിനെയും നമ്മുക്ക് ലൊക്കേഷൻ ചിത്രങ്ങളിൽ കാണാം . ഇട്ടിമാണിയുടെ മെഗാ മാർഗ്ഗം കളിയുടെ ചിത്രീകരണം ആണ് ഇന്ന് മാളയിൽ വെച്ച് നടന്നത്. തീയേറ്ററുകളിൽ ഏറെ പൊട്ടിച്ചിരിയും കയ്യടിയും കിട്ടാൻ സാധ്യതയുള്ള ഒരു രംഗം ആയിരിക്കും ഇതെന്നാണ് ലൊക്കേഷൻ ചിത്രങ്ങൾ നൽകുന്ന സൂചന. പ്രസന്ന മാസ്റ്റർ ആണ് ഈ ഗാന രംഗത്തിനു വേണ്ടി നൃത്ത സംവിധാനം നിർവഹിച്ചത്. നവാഗതരായ ജിബി- ജോജു ടീം ഒരുക്കുന്ന ഇട്ടിമാണി മേഡ് ഇൻ ചൈന ഒരു പക്കാ ഫാമിലി കോമഡി എന്റെർറ്റൈനെർ ആയാണ് ഒരുക്കുന്നത്. ഓണത്തിന് റിലീസ് ചെയ്യാൻ പോകുന്ന ഈ ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമ്മിക്കുന്നത്. ഹണി റോസ്, രാധിക ശരത് കുമാർ, കെ പി എ സി ലളിത, അജു വർഗീസ്, വിനു മോഹൻ എന്നിവരും ഈ ചിത്രത്തിന്റെ താര നിരയിൽ ഉണ്ട്.