കുര്യനെ ഏറ്റെടുത്തതിന് നന്ദി; സോഷ്യൽ മീഡിയയിൽ സജീവമാകുന്നെന്ന് ലാലു അലക്സ്..!

ഈ കഴിഞ്ഞ ജനുവരി ഇരുപത്തിയാറിനു ആണ് മോഹൻലാലിനെ നായകനാക്കി പൃഥ്വിരാജ് സുകുമാരൻ ഒരുക്കിയ ബ്രോ ഡാഡി എന്ന ചിത്രം ഡിസ്‌നി പ്ലസ് ഹോട്ട് സ്റ്റാർ വഴി പ്രേക്ഷകരുടെ മുന്നിൽ എത്തിയത്. ഒരു പക്കാ ഫാമിലി കോമഡി എന്റെർറ്റൈനെർ ആയി ഒരുക്കിയ ഈ ചിത്രം ഗംഭീര പ്രേക്ഷക പ്രതികരണമാണ് നേടുന്നത്. പാൻ ഇന്ത്യൻ തലത്തിൽ സൂപ്പർ ഹിറ്റാവുന്ന ഈ ചിത്രത്തിന് അന്യ ഭാഷ പ്രേക്ഷകരിൽ നിന്ന് അഭൂതപൂർവമായ അഭിപ്രായങ്ങൾ ആണ് ലഭിക്കുന്നത്. മോഹൻലാലിനൊപ്പം പൃഥ്വിരാജ് സുകുമാരൻ, ലാലു അലക്സ്, മീന, കനിഹ, കല്യാണി പ്രിയദർശൻ, സൗബിൻ ഷാഹിർ, ജഗദീഷ്, ഉണ്ണി മുകുന്ദൻ, മല്ലിക സുകുമാരൻ, ജാഫർ ഇടുക്കി തുടങ്ങി ഒട്ടേറെ പേര് അഭിനയിച്ച ഈ ചിത്രം മികച്ച അഭിപ്രായം നേടി വൻ വിജയം നേടുമ്പോൾ അതിൽ ഏറ്റവും കൂടുതൽ കയ്യടി നേടുന്നത് മോഹൻലാൽ അവതരിപ്പിച്ച ജോൺ കാറ്റാടി എന്ന കഥാപാത്രവും ലാലു അലക്സ് അവതരിപ്പിച്ച കുര്യൻ എന്ന കഥാപാത്രവുമാണ്. ഇവരുടെ കട്ടക്ക് നിന്നുള്ള കിടിലൻ പ്രകടനമാണ് ഈ ചിത്രത്തിന്റെ ഹൈലൈറ്റ്. ഒരിടവേളക്ക് ശേഷം ലാലു അലക്സ് എന്ന നടനെ സോഷ്യൽ മീഡിയ ആഘോഷിക്കുന്ന കാഴ്ചയാണ് കാണാൻ സാധിക്കുന്നത്.

ഇപ്പോഴിതാ ഇപ്പോൾ വീണ്ടും സോഷ്യൽ മീഡിയയിൽ സജീവമാകുകയാണ് ലാലു അലക്സ്. അതറിയിച്ചു കൊണ്ട് അദ്ദേഹം ഇട്ട ഫേസ്ബുക് പോസ്റ്റ് ഏറെ ശ്രദ്ധ നേടുന്നുണ്ട്. വളരെക്കാലത്തിന് ശേഷം താൻ എല്ലാ സോഷ്യൽ മീഡിയ പ്ലാറ്റ്‌ഫോമുകളിലും സജീവമാകുകയാണ് എന്നും പ്രേക്ഷകരുടെ എല്ലാ സന്ദേശങ്ങളും ആശംസകളും പോസ്റ്റുകളും താൻ വായിച്ചു എന്നും അദ്ദേഹം കുറിക്കുന്നു. ബ്രോ ഡാഡി എന്ന സിനിമയ്ക്കും കുര്യൻ മാളിയേക്കലിലും നൽകിയ സ്നേഹത്തിനും പിന്തുണയ്ക്കും എല്ലാവർക്കും നന്ദി എന്നും കൂട്ടിച്ചേർത്തു കൊണ്ടാണ് അദ്ദേഹം തന്റെ കുറിപ്പ് അവസാനിപ്പിക്കുന്നത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ബ്രോ ഡാഡി രചിച്ചത് ശ്രീജിത്ത്, ബിബിൻ എന്നിവർ ചേർന്നാണ്.