പൊട്ടിച്ചിരിയുടെ പുതിയ രസക്കൂട്ടുമായി ലഡ്ഡു എത്തുന്നു; റിലീസ് നവംബർ പതിനാറിന്..

നവാഗതനായ അരുൺ ജോർജ് കെ ഡേവിഡ് സംവിധാനം ചെയ്ത ചിത്രമാണ് ലഡൂ. ഈ വരുന്ന നവംബർ പതിനാറിന് റിലീസ് ചെയ്യാൻ പോകുന്ന ഈ ചിത്രം പൊട്ടിച്ചിരിയുടെ പുതിയ രസക്കൂട്ടുകളുമായി ആണ് എത്തുന്നത്. വിനയ് ഫോർട്ട്, ബാലു വർഗീസ്, ശബരീഷ് വർമ്മ എന്നിവർ കേന്ദ്ര കഥാപാത്രങ്ങൾ ആയി എത്തുന്ന ഈ ചിത്രം രചിച്ചിരിക്കുന്നത് സാഗർ സത്യൻ ആണ്. എസ് വിനോദ് കുമാർ, സുകുമാരൻ തെക്കേപ്പാട്ടു എന്നിവർ നേതൃത്വം നൽകുന്ന മിനി സ്റ്റുഡിയോ ആണ് ഈ ചിത്രം നിർമ്മിച്ചിരിക്കുന്നത്. സൂപ്പർ സ്റ്റാർ രജനികാന്ത് ചിത്രം കാല, ധനുഷ് ചിത്രം വട ചെന്നൈ എന്നിവ കേരളത്തിൽ വിതരണം ചെയ്ത ഇവരാണ് സൂപ്പർ ഹിറ്റായ ടോവിനോ തോമസ് ചിത്രമായ മറഡോണ നിർമ്മിച്ചത്.

ഒരു റൊമാന്റിക് കോമഡി ആയി ഒരുക്കിയിരിക്കുന്ന ഈ ചിത്രത്തിൽ വിനയ് ഫോർട്ട്, ബാലു വർഗീസ്, ശബരീഷ് എന്നിവർ അവതരിപ്പിക്കുന്ന മൂന്നു കൂട്ടുകാരുടെ കഥയാണ് അവതരിപ്പിക്കുന്നത്. റൊമാന്സും കോമെഡിയും നിറഞ്ഞ ഈ ചിത്രം ഒരു ഗംഭീര എന്റെർറ്റൈനെർ ആവുമെന്ന് തന്നെയാണ് പ്രേക്ഷക പ്രതീക്ഷ. ഈ ചിത്രത്തിന്റെ രസകരമായ പോസ്റ്ററുകൾ സോഷ്യൽ മീഡിയയുടെ ശ്രദ്ധ നേടിയെടുക്കുന്നുണ്ട്. ദിലീഷ് പോത്തൻ, സാജു നവോദയ, മനോജ് ഗിന്നസ്, ഇന്ദ്രൻസ്, നിഷ സാരംഗ് എന്നിവരും ഈ ചിത്രത്തിന്റെ താര നിരയുടെ ഭാഗമാണ്. ഗൗതം ശങ്കർ ദൃശ്യങ്ങൾ ഒരുക്കിയ ഈ ചിത്രത്തിന് സംഗീതം പകർന്നത് രാജേഷ് മുരുഗേഷനും എഡിറ്റ് ചെയ്തിരിക്കുന്നത് ലാൽ കൃഷ്ണനും ആണ്. ഏതായാലും ചിത്രത്തെ കുറിച്ചുള്ള പ്രേക്ഷക പ്രതീക്ഷകൾ വളരെ വലുതാണ്.