കാസർഗോഡ് നടന്ന ആ സംഭവം ഇനി വെള്ളിത്തിരയിൽ; രാജീവ് രവിയുടെ കുറ്റവും ശിക്ഷയും വരുന്നു..!

കമ്മട്ടിപ്പാടത്തിന് ശേഷം പ്രശസ്ത സംവിധായകൻ രാജീവ് രവി ഒരുക്കിയ ഏറ്റവും പുതിയ ചിത്രങ്ങളിൽ ഒന്നാണ് കുറ്റവും ശിക്ഷയും. ഇപ്പോഴിതാ ഈ ചിത്രത്തിന്റെ റിലീസ് തീയതി പ്രഖ്യാപിച്ചിരിക്കുകയാണ്. മെയ് 27 നു ആണ് ഈ ചിത്രം റിലീസ് ചെയ്യാൻ പോകുന്നത്. യുവ താരം ആസിഫ് അലി നായകനായി എത്തുന്ന ഈ ചിത്രം ഒരു ഇൻവെസ്റ്റിഗേഷൻ ത്രില്ലർ ആയാണ് ഒരുക്കിയിരിക്കുന്നത്. തൊണ്ടിമുതലും ദൃക്സാക്ഷിയും എന്ന ചിത്രത്തിലൂടെ പ്രശസ്തനായ നടനും പൊലീസ് ഉദ്യോഗസ്ഥനുമായ സിബി തോമസ് കഥ രചിച്ച ഈ ചിത്രത്തിന് തിരക്കഥ ഒരുക്കിയത് അദ്ദേഹവും മാധ്യമപ്രവര്‍ത്തകനും തിരക്കഥാകൃത്തുമായ ശ്രീജിത്ത് ദിവാകരനും ചേർന്നാണ്. അഞ്ചു പൊലീസ് ഉദ്യോഗസ്ഥര്‍ ഒരു ജ്വല്ലറി മോഷണത്തെ തുടര്‍ന്ന്, കേസ് അന്വേഷണത്തിനായി വടക്കേ ഇന്ത്യയിലേക്ക് നടത്തിയ യാത്രയാണ് സിനിമയായിരിക്കുന്നത്. കാസർകോഡ് നടന്ന യഥാർഥ സംഭവത്തെ ആസ്പദമാക്കിയാണ് ചിത്രം ഒരുക്കിയിട്ടുള്ളത്.

ജയ്പൂർ ആയിരുന്നു ചിത്രത്തിന്റെ പ്രധാന ലൊക്കേഷൻ. കട്ടപ്പനയിലും ഷൂട്ട് ചെയ്ത ഈ ചിത്രത്തിന്റെ ട്രൈലെർ നേരത്തെ തന്നെ വന്നു സൂപ്പർ ഹിറ്റായിരുന്നു. ഷറഫുദീൻ, സണ്ണി വെയ്ൻ, അലൻസിയർ ലോപ്പസ്, സെന്തിൽ കൃഷ്ണ, ശ്രിന്ദ തുടങ്ങിയവരാണ് ചിത്രത്തിലെ മറ്റ് പ്രധാന താരങ്ങൾ. ഫിലിം റോള്‍ പ്രൊഡക്ഷന്‍സിന്റെ ബാനറില്‍ അരുണ്‍കുമാര്‍ വി ആർ നിർമ്മിച്ച ഈ ചിത്രത്തിന് സംഗീതം ഒരുക്കിയത് ഡോൺ വിൻസെന്റ് ആണ്. ബി.അജിത്കുമാർ എഡിറ്റിങ്ങും, സുരേഷ് രാജൻ ക്യാമറയും കൈകാര്യം ചെയ്തിരിക്കുന്ന ഈ ചിത്രം വലിയ പ്രതീക്ഷകളോടെയാണ് പ്രേക്ഷകർ കാത്തിരിക്കുന്നത്. നിവിൻ പോളി നായകനായ തുറമുഖം എന്ന ചിത്രം രാജീവ് രവിയുടേതായി ഇനി റിലീസ് ചെയ്യാനുണ്ട്.