കുട്ടൻ പിള്ളയുടെ ശിവരാത്രി പുതിയ പോസ്റ്ററും സോഷ്യൽ മീഡിയയുടെ ശ്രദ്ധ നേടുന്നു..!

പ്രശസ്ത നടൻ സുരാജ് വെഞ്ഞാറമൂട് നായകനായി എത്തുന്ന പുതിയ ചിത്രമാണ് കുട്ടൻപിള്ളയുടെ ശിവരാത്രി. ജീൻ മാർക്കോസ് സംവിധാനം ചെയ്തിരിക്കുന്ന ഈ ചിത്രം നിർമ്മിച്ചിരിക്കുന്നത് രാജി നന്ദകുമാർ ആണ്. ഇതിനു മുൻപ് ഇന്ദ്രജിത്തിനെ നായകനാക്കി എയ്‌ഞ്ചൽസ് എന്ന ചിത്രമൊരുക്കിയ ആളാണ് ജീൻ മാർക്കോസ്. കുട്ടൻപിള്ളയുടെ ശിവരാത്രി എന്ന ഈ ചിത്രത്തിന്റെ മോഷൻ പോസ്റ്റർ റിലീസ് ചെയ്തത് മെഗാ സ്റ്റാർ മമ്മൂട്ടി ആയിരുന്നു. അത് വളരെയധികം ശ്രദ്ധ നേടിയിരുന്നു സോഷ്യൽ മീഡിയയിൽ. അതിനു ശേഷം ചിത്രത്തിന്റെ അണിയറ പ്രവർത്തകർ കൊണ്ട് വന്ന ഒരു മത്സരവും സിനിമാ പ്രേമികളുടെ ശ്രദ്ധ നേടിയെടുത്തിരുന്നു. ഇപ്പോഴിതാ ഈ ചിത്രത്തിന്റെ പുതിയ പോസ്റ്റർ റിലീസ് ചെയ്തിരിക്കുകയാണ്. പുതിയ പോസ്റ്ററിനും മികച്ച പ്രതികരണം ആണ് സോഷ്യൽ മീഡിയയിൽ നിന്ന് ലഭിക്കുന്നത്.

കുട്ടൻപിള്ള എന്ന മധ്യവയസ്കനായ പോലീസ് കോൺസ്റ്റബിൾ ആയാണ് സുരാജ് വെഞ്ഞാറമ്മൂട് ഈ ചിത്രത്തിൽ അഭിനയിക്കുന്നത്. ഈ കഥാപാത്രം തന്റെ അച്ഛനെ ഓർമ്മിപ്പിക്കുന്നു എന്നും, തന്നെ ഈ ചിത്രത്തിലേക്ക് ഏറ്റവും കൂടുതൽ ആകർഷിച്ചതും അതാണ് എന്നും സുരാജ് വെഞ്ഞാറമൂട് മാധ്യമങ്ങളോട് പറഞ്ഞിരുന്നു. സംവിധായകൻ ജീൻ മാർക്കോസ് തന്നെ തിരക്കഥ രചിച്ച ഈ ചിത്രത്തിൽ ബിജു സോപാനം, മിഥുൻ രമേശ്, ശ്രിന്ദ എന്നിവരും നിർണ്ണായക വേഷങ്ങൾ ചെയ്യുന്നു. ആലങ്ങാട് പ്രൊഡക്ഷൻസിന്റെ ബാനറിൽ നിർമ്മിച്ചിരിക്കുന്ന ഈ ചിത്രത്തിന് ദൃശ്യങ്ങൾ ഒരുക്കിയിരിക്കുന്നത് ഫാസിൽ നാസർ ആണ്. ഷിബിഷ് കെ ചന്ദ്രൻ എഡിറ്റ് ചെയ്തിരിക്കുന്ന ഈ ചിത്രം അധികം വൈകാതെ തന്നെ തീയേറ്ററുകളിൽ എത്തുമെന്നാണ് സൂചന. ആഭാസം എന്ന ചിത്രവും സുരാജ് നായകനായി തീയേറ്ററുകളിൽ എത്താനുണ്ട്.