കുടുംബ പ്രേക്ഷകർക്ക് ചിരിയുത്സവമൊരുക്കാൻ വീണ്ടുമൊരു കുഞ്ചാക്കോ ബോബൻ ചിത്രം; ജോണി ജോണി യെസ് അപ്പാ റിലീസിനൊരുങ്ങുന്നു..!

കുടുംബ പ്രേക്ഷകർക്ക് ഏറെ ഇഷ്ടമുള്ള ഒരു നടനാണ് കുഞ്ചാക്കോ ബോബൻ എന്ന മലയാളികളുടെ സ്വന്തം ചാക്കോച്ചൻ. ഈ വർഷം ഇതിനോടകം ഒന്നിലധികം ഹിറ്റുകളുടെ ഭാഗമായി കഴിഞ്ഞ കുഞ്ചാക്കോ ബോബൻ തന്റെ പുതിയ ചിത്രവുമായി അടുത്ത മാസം എത്തുകയാണ്. ജോണി ജോണി യെസ് അപ്പാ എന്ന ഈ ചിത്രത്തിന്റെ ട്രൈലെർ ഇപ്പോൾ സോഷ്യൽ മീഡിയയിൽ ട്രെൻഡ് ആയി കഴിഞ്ഞു. കുഞ്ചാക്കോ ബോബനും ഷറഫുദീനും വിജയ രാഘവനുമെല്ലാം ചേർന്നൊരുക്കുന്ന ഒരു കിടിലൻ ചിരിയുത്സവമായിരിക്കും ഈ ചിത്രം എന്ന സൂചനയാണ് ഇതിന്റെ ട്രൈലെർ നമ്മുക്ക് നൽകുന്നത്. പാവാട എന്ന സൂപ്പർ ഹിറ്റ് പൃഥ്വിരാജ് ചിത്രത്തിന് ശേഷം മാർത്താണ്ഡൻ ഒരുക്കിയ ഈ ചിത്രം രചിച്ചിരിക്കുന്നത് വെള്ളിമൂങ്ങ എന്ന ബ്ലോക്ക്ബസ്റ്റർ ബിജു മേനോൻ- ജിബു ജേക്കബ് ചിത്രം എഴുതിയ ജോജി തോമസ് ആണ്.

അനു സിത്താരയും മമത മോഹൻദാസും നായികാ വേഷങ്ങൾ ചെയ്യുന്ന ഈ ചിത്രത്തിൽ മാസ്റ്റർ സനൂപ് സന്തോഷും വളരെ നിർണ്ണായകമായ ഒരു വേഷം ചെയ്യുന്നു. ചിരിയിൽ പൊതിഞ്ഞ ഒരു കമ്പ്ലീറ്റ് ഫാമിലി എന്റെർറ്റൈനെർ ആയിരിക്കും ഈ ചിത്രം. ഷാൻ റഹ്മാൻ സംഗീതം നൽകിയ ഈ ചിത്രത്തിന് കാമറ ചലിപ്പിച്ചിരിക്കുന്നതു വിനോദ് ഇല്ലമ്പിളി ആണ്. കുഞ്ചാക്കോ ബോബന്റെ കോമെടിയും കുസൃതിയും എനെർജിയുമെല്ലാം കൃത്യമായ അളവിൽ കോർത്തിണക്കിയാണ് മാർത്താണ്ഡൻ ഈ ചിത്രം ഒരുക്കിയിരിക്കുന്നത് എന്നത് ട്രൈലറിൽ നിന്ന് തന്നെ വ്യക്തമാണ്. പ്രശസ്ത നിർമ്മാതാവായ വൈശാഖ് രാജൻ ആണ് തന്റെ വൈശാഖ സിനിമയുടെ ബാനറിൽ ഈ ചിത്രം നിർമ്മിച്ചിരിക്കുന്നത്. പ്രശസ്ത നടി ഗീതയും ഈ ചിത്രത്തിലെ ഒരു പ്രധാന കഥാപാത്രം അവതരിപ്പിച്ചിരിക്കുന്നു.