അരവിന്ദന്റെ അതിഥികൾ ടീമിന് ആദരം ഒരുക്കി കൊല്ലം ജി മാക്‌സ് തിയേറ്റർ..!

ഈ വർഷം മലയാള സിനിമയിൽ ഉണ്ടായ സൂപ്പർ ഹിറ്റുകളിൽ ഒന്നാണ് വിനീത് ശ്രീനിവാസൻ നായകനായ അരവിന്ദന്റെ അതിഥികൾ . കഥ പറയുമ്പോൾ, മാണിക്യ കല്ല് തുടങ്ങിയ സൂപ്പർ ഹിറ്റ് ചിത്രങ്ങൾ സംവിധാനം ചെയ്ത എം മോഹനൻ ഒരുക്കിയ ചിത്രമാണ് ഇത്. പ്രശസ്ത രചയിതാവായ രാജേഷ് രാഘവൻ ആണ് ഈ ഫാമിലി എന്റെർറ്റൈനെറിനു തിരക്കഥ ഒരുക്കിയിരിക്കുന്നത്. പതിയറ എന്റെർറ്റൈന്മെന്റ്സ്, ബിഗ് ബാംഗ് എന്റെർറ്റൈന്മെന്റ്സ് എന്നിവയുടെ ബാനറിൽ പ്രദീപ് കുമാർ പതിയറ, നോബിൾ ബാബു തോമസ് എന്നിവർ ചേർന്നു നിർമ്മിച്ച ഈ ചിത്രം വലിയ വിജയമാണ് തീയേറ്ററുകളിൽ നിന്നു നേടിയത്. ഇപ്പോഴിതാ അൻപതു സുവർണ്ണ ദിനങ്ങൾ തീയേറ്ററുകളിൽ പിന്നിട്ട ഈ ചിത്രത്തിന്റെ അണിയറ പ്രവർത്തകർക്ക് സ്വീകരണവും ആദരവും നൽകിയിരിക്കുകയാണ് കൊല്ലത്തെ ജി മാക്സ് തിയേറ്റർ

അവിടെ അന്പത്തിയഞ്ചു ദിവസം പ്രദർശിപ്പിച്ച ഈ ചിത്രതിന്റെ അണിയറ പ്രവർത്തകരെ ഇന്നലെ വൈകുന്നേരം നടന്ന ചടങ്ങിലാണ് ആദരിച്ചത്. കൊല്ലം എം എൽ എ ആയ പ്രശസ്ത നടൻ മുകേഷ് ഉത്ഘാടനം ചെയ്ത ചടങ്ങിൽ ശ്രീനിവാസനും വിനീത് ശ്രീനിവാസനും ഒഴികെ മറ്റു അണിയറ പ്രവർത്തകർ എല്ലാവരും തന്നെ എത്തിച്ചേർന്നിരുന്നു.

നിഖില വിമൽ നായികാ വേഷത്തിൽ അഭിനയിച്ച ഈ ചിത്രത്തിൽ ശ്രീനിവാസനും ഒരു നിർണ്ണായക വേഷം ചെയ്തിരിക്കുന്നു. അരവിന്ദൻ എന്ന കഥാപാത്രത്തെയാണ് വിനീത് ശ്രീനിവാസൻ ഈ ചിത്രത്തിൽ അവതരിപ്പിച്ചിരിക്കുന്നത്. പ്രേം കുമാർ ഉർവശി, അജു വര്ഗീസ്, പ്രേം കുമാർ, കോട്ടയം നസീർ, കെ പി എ സി ലളിത, ശാന്തി കൃഷ്ണ, ബിജു കുട്ടൻ, ബൈജു എന്നീ അഭിനേതാക്കളും തങ്ങളുടെ വേഷങ്ങൾ മനോഹരമായി തന്നെ ചെയ്തു ഫലിപ്പിച്ചു. ഷാൻ റഹ്മാൻ ഒരുക്കിയ സംഗീതവും സ്വരൂപ് ഫിലിപ്പ് ഒരുക്കിയ ദൃശ്യങ്ങളും ഈ ചിത്രത്തെ മനോഹരമാക്കി.