സ്വപ്നതുല്യമായ താര നിരയുമായി മോഹൻലാൽ- പൃഥ്വിരാജ് ചിത്രം ലൂസിഫർ ജൂലൈ പതിനെട്ടിന് തുടങ്ങുന്നു..!

പ്രേക്ഷകർ ആവേശത്തോടെ കാത്തിരിക്കുന്ന മോഹൻലാൽ ചിത്രമായ ലൂസിഫറിന്റെ ചിത്രീകരണം വരുന്ന മാസം പതിനെട്ടു മുതൽ ആരംഭിക്കും. ഈ ചിത്രമൊരുക്കി കൊണ്ട് സംവിധായകനായി അരങ്ങേറ്റം കുറിക്കുന്ന യുവ സൂപ്പർ താരം പൃഥ്വിരാജ് തന്നെയാണ് ഈ വിവരം ഒരു റേഡിയോ ഇന്റർവ്യൂയിൽ വെളിപ്പെടുത്തിയത്. മുരളി ഗോപി തിരക്കഥ ഒരുക്കിയിരിക്കുന്ന ഈ മാസ്സ് എന്റെർറ്റൈനെർ നിർമ്മിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ്. സ്വപ്നതുല്യമായ താര നിരയാണ് ഈ ചിത്രത്തിന് വേണ്ടി പൃഥ്വിരാജ് അണിനിരത്തുന്നത് എന്നാണ് സൂചനകൾ പറയുന്നത്.

മോഹൻലാൽ നായകനായി എത്തുമ്പോൾ ഇതിലെ വില്ലൻ വേഷം അവതരിപ്പിക്കാൻ എത്തുന്നത് ബോളിവുഡ് താരം വിവേക് ഒബ്‌റോയ് ആണെന്നാണ് സൂചന. അതുപോലെ തന്നെ നെഗറ്റീവ് വേഷത്തിൽ ഇന്ദ്രജിത് സുകുമാരനും എത്തുന്ന ഈ ചിത്രത്തിൽ യുവ താരം ടോവിനോ തോമസും ഒരു നിർണ്ണായക വേഷം ചെയ്യുമെന്ന് സൂചനകൾ ഉണ്ട്. മഞ്ജു വാര്യർ ആയിരിക്കും ഈ ചിത്രത്തിലെ നായിക എന്നും ക്വീൻ എന്ന ചിത്രത്തിലെ നായികയായ സാനിയ ഈ ചിത്രത്തിൽ മോഹൻലാലിൻറെ മകൾ ആയി എത്തുമെന്നും റിപ്പോർട്ടുകൾ പറയുന്നു.

സുജിത് വാസുദേവ് ദൃശ്യങ്ങളും ദീപക് ദേവ് സംഗീതവും ഒരുക്കുന്ന ഈ ചിത്രം വമ്പൻ ബഡ്ജറ്റിൽ ആണ് ഒരുക്കുന്നത്. കേരളവും നോർത്ത് ഇന്ത്യൻ നഗരങ്ങളും കൂടാതെ വിദേശത്തും ഈ ചിത്രത്തിന്റെ ചിത്രീകരണം ഉണ്ടാകുമെന്നു സ്ഥിതീകരിക്കാത്ത വിവരങ്ങൾ വരുന്നുണ്ട്. ചിത്രത്തിന്റെ ടൈറ്റിൽ ഫോണ്ട് നേരത്തെ തന്നെ റിലീസ് ചെയ്യുകയും സോഷ്യൽ മീഡിയയിൽ തരംഗമായി മാറുകയും ചെയ്തിരുന്നു. ലൂസിഫറിനെ കുറിച്ചുള്ള കൂടുതൽ വിവരങ്ങൾ വരും ദിവസങ്ങളിൽ പുറത്തു വിടും എന്നാണ് ലഭിക്കുന്ന സൂചനകൾ പറയുന്നത്.