കാളിയനെ ബ്രഹ്മാണ്ഡമാക്കാൻ വരുന്നു കെ ജി എഫ് താരം

യുവ സൂപ്പർ താരം പൃഥ്വിരാജ് സുകുമാരൻ നായകനായി എത്തുന്ന ബ്രഹ്മാണ്ഡ ചിത്രമാണ് കാളിയൻ. ഇപ്പോൾ പ്രീ-പ്രൊഡക്ഷൻ സ്റ്റേജിലുള്ള ഈ ചിത്രം ഈ വർഷമവസാനത്തോടെ ആരംഭിക്കുമെന്നാണ് സൂചന. പൃഥ്വിരാജ് സുകുമാരനൊപ്പം വമ്പൻ താരനിരയണിനിരക്കുമെന്നു കരുതുന്ന ഈ ചിത്രത്തിലേക്ക് ഇപ്പോൾ ഒരു വലിയ പേര് കൂടി ചേർക്കപ്പെട്ടിരിക്കുകയാണ്. കെ ജി എഫ് സീരീസിലൂടെ ഇന്ത്യ മുഴുവൻ പ്രശസ്തനായ സംഗീത സംവിധായകൻ രവി ബസ്‌റൂർ ആണ് ഈ ചിത്രത്തിന് വേണ്ടി സംഗീത സംവിധാനം നിർവഹിക്കുക. പൃഥ്വിരാജ് തന്നെയാണ് ഇന്നലെ ഈ വിവരം ഒഫീഷ്യലായി പുറത്ത് വിട്ടത്. രവി ബസ്‌റൂരിന്റെ വരവോടെ കാളിയൻ ഒന്നുകൂടി വലിയ ചിത്രമായി മാറിയിരിക്കുകയാണ്. ഈ ചിത്രത്തിന് വേണ്ടിയുള്ള അഭിനേതാക്കളുടെ ഓഡിഷൻ ഈ കഴിഞ്ഞ മെയ് മാസത്തിൽ നടന്നിരുന്നു.

നവാഗതനായ എസ് മഹേഷ് സംവിധാനം ചെയ്യാൻ പോകുന്ന ഈ ചിത്രം, വേണാട് ചരിത്രത്തിലെ വീരപുരുഷനും പടത്തലവനുമായ ഇരവിക്കുട്ടിപ്പിള്ളയുടെയും, ആത്മ മിത്രം കുഞ്ചിറക്കോട്ട് കാളിയുടെയും കഥയാണ് പറയാൻ പോകുന്നത്. മാധ്യമപ്രവര്‍ത്തകനായ ബി ടി അനില്‍ കുമാര്‍ തിരക്കഥ രചിച്ചിരിക്കുന്ന ഈ ചിത്രം മാജിക് മൂണ്‍ പ്രൊഡക്ഷന്‍സിന്റെ ബാനറില്‍ രാജീവ് ഗോവിന്ദനാണ് നിർമ്മിക്കുക. സുജിത് വാസുദേവ് കാമറ ചലിപ്പിക്കാൻ പോകുന്ന ഈ ചിത്രത്തിന് നേരത്തെ സംഗീതമൊരുക്കാനിരുന്നത് ബോളിവുഡിലെ സൂപ്പർ ഹിറ്റ് ടീമായ ശങ്കർ- ഇഹ്‌സാൻ- ലോയ് ആയിരുന്നു. അവർ മാറിയാണ് രവി ബസ്‌റൂർ ആ സ്ഥാനത്തേക്ക് വന്നത്. ബാഹുബലി, കെ ജി എഫ് എന്നിവ പോലെ ഒരു ബഹുഭാഷാ ചിത്രമായി കാളിയൻ ഒരുക്കാനാണ് അണിയറ പ്രവർത്തകരുടെ ശ്രമമെന്നാണ് റിപ്പോർട്ടുകൾ സൂചിപ്പിക്കുന്നത്. ബംഗ്ലാന്‍ പ്രൊഡക്ഷന്‍ ഡിസൈന്‍ നിർവഹിക്കുന്ന ഈ ചിത്രം കർണാടകം, ശ്രീലങ്ക എന്നിവിടങ്ങളിലൊക്കെ ഷൂട്ട് ചെയ്യുമെന്ന് വാർത്തകളുണ്ട്.